အီရတ်မှ အစ္စရေး မဟာဗျူဟာဌာနကို တိုက်ခိုက်ခဲ့ဟု အီရန်ထုတ်ပြန်

မတ် ၁၃၊ ၂၀၂၂

M-Media 

– အီရတ်နိုင်မြောက်ပိုင်း ကာဒ့်ဒေသမြို့တော် အီရ်ဘီလ်က အမေရိကန် ကောင်စစ်၀န်ရုံး သောကြာနေ့က ဒုံးကျည်နဲ့ တိုက်ခိုက်ခံခဲ့ရပြီး အီရန်တော်လှန်ရေး အစောင့်တပ်ဖွဲ့ (IRGC) က သူတို့လုပ်တာလို့ ထုတ်ပြန်ပါတယ်။ 

IRGC ရဲ့ ထုတ်ပြန်ချက်မှာ အစ္စရေးရဲ့ မဟာဗျူဟာဌာန အဆောက်အဦးကို တိုက်ခိုက်ခဲ့တယ်လို့ ဖော်ပြပါတယ်။ အီရန်ရဲ့ ဒီတိုက်ခိုက်မှုဟာ  အခုတစ်ပတ် အစောပိုင်း ဆီးရီးယားမှာ IRGC တပ်ဖွဲ့၀င်နှစ်ဦးကို အစ္စရေးက သတ်ဖြတ်မှုအတွက် လက်တုန့်ပြန်တာလို့ ယူဆရပါတယ်။ 

အစ္စရေးဖက်က တိုက်ခိုက်မှုတွေ ထပ်လုပ်လာရင် ပြင်းထန်၊ ဆိုးရွားတဲ့ တုန့်ပြန်မှုနဲ့ ရင်ဆိုင်ရမယ်လို့ IRGC က သတိပေးခဲ့ပါတယ်။ 

တိုက်ခိုက်မှုဖြစ်ပွားခဲ့ကြောင်း ကာ့ဒ်ဒေသ တာ၀န်ရှိသူတွေက အတည်ပြုခဲ့ပြီး ဒုံးကျည် ၈ လုံးကနေ ၁၂ လုံးအထိရှိကာ ကောင်စစ်၀န်ရုံး အဆောက်အဦးသစ် ပျက်ဆီးကာ အရပ်သားတစ်ဦး ဒဏ်ရာရတယ်လို့ ထုတ်ပြန်ပါတယ်။ 

ကာ့ဒ်ဒေသဟာ အီရတ်မှာ ကိုယ်ပိုင်အုပ်ချုပ်ခွင့်ရ ဒေသဖြစ်ပြီး ကာ့ဒ်အစိုးရ၀န်ကြီးချုပ်နဲ့ ဘာသာရေးခေါင်းဆောင်တွေက ဒီတိုက်ခိုက်မှုကို ရှုတ်ချခဲ့ပါတယ်။ 

Ref: Aljazeera