ရုရှား-ယူကရိန်းဆွေးနွေးပွဲ တိုးတက်မှုအနည်းငယ်ရှိလာ

မတ် ၁၆၊ ၂၀၂၂

M-Media 

-စစ်ပွဲရပ်ရေး ယူကရိန်းနဲ့ ရုရှားတို့ရဲ့ ဆွေးနွးမှုတွေမှာ တိုးတက်မှု အနည်းငယ်ရှိလာတာကို တွေ့လာရပါတယ်။ 

ရုရှားက ယူကရိန်းကို ကျူးကျော်တိုက်ခိုက်မှုဟာ ၃ ပတ်အတွင်း ရောက်လာပြီ ဖြစ်ပြီး တိုက်ခိုက်မှုတွေကလည်း ပိုမို ပြင်းထန်လာပါတယ်။ 

မြို့ကြီးတစ်ချို့ကို သိမ်းပိုက်နိုင်ပြီလို့ ရုရှားဖက်က ပြောဆိုထားပါတယ်။ စစ်ပွဲကြောင့် ယူကရိန်းအရပ်သား သေဆုံးမှုအရေအတွက် မြင့်တက်လာပြီး၊ အိမ်နီးချင်းနိုင်ငံတွေကို ထွက်ပြေးရတဲ့ ဒုက္ခသည်အရေအတွက်ကလည်း သန်းချီ ရှိလာပါတယ်။ 

ယူကရိန်းသမ္မတ ဇယ်လင်စကီးက ဆွေးနွေးပွဲမှာ ရုရှားရဲ့ တောင်းဆိုမှုတွေက ပိုပြီး လက်တွေ့ကျလာတာကို တွေ့ရကြောင်း၊ ဆွေးနွေးပွဲ အောင်မြင်ဖို့အတွက် အချိန်ယူရမှာဖြစ်ကြောင်း အင်္ဂါနေ့မှာ ပြောကြားခဲ့ပါတယ်။

အမေရိကန်ဦးဆောင်တဲ့ နေတိုးအဖွဲ့ကို ၀င်ရောက်လို့မရဘူးဆိုတဲ့ အချက်ကို တိုင်းပြည်က နားလည်ရမယ်လို့လည်း ဇယ်လင်စကီးက ပြောပါတယ်။ ကျူးကျော်မှုအတွက် ရုရှားရဲ့ အကြောင်းပြချက်တွေထဲမှာ ယူကရိန်းကို နေတိုးအဖွဲ့၀င်မဖြစ်စေဖို့ အချက်လည်း ပါ၀င်ပါတယ်။ 

ရုရှားနိုင်ငံခြားရေး၀န်ကြီး ဆာဂျီလာဗရော့က ညှိနှိုင်းဖို့အတွက် မျှော်လင့်ချက်ရှိနေတယ်လို့ မနေ့က ပြောကြားခဲ့ပြီး ငြိမ်းချမ်းရေးရဖို့ မလွယ်သေးဘူးလို့ ဆိုပါတယ်။ 

Ref: BBC