အာဆီယံအထူးကိုယ်စားလှယ်ခရီးစဥ် ထူးထူးခြားခြား ပြောင်းလဲမှု မရှိနိုင်

မတ် ၁၉၊ ၂၀၂၂

M-Media 

-လာမယ့်တစ်ပါတ် အာဆီယံအထူးကိုယ်စားလှယ်ရဲ့ မြန်မာနိုင်ငံခရီးစဥ်ဟာ အကြမ်းဖက်မှုတွေ ရပ်တန့်ရေး အားလုံးအဆင်ပြေစေမယ့် အခြေအနေတစ်ခု ဖန်တီးဖို့ ဖြစ်တယ်လို့ ကမ္ဘောဒီးယားနိုင်ငံခြားရေး၀န်ကြီးဌာနက ထုတ်ပြန်ပါတယ်။ 

မြန်မာနိုင်ငံဆိုင်ရာ အာဆီယံအထူးကိုယ်စားလှယ်ဖြစ်တဲ့ ကမ္ဘောဒီးယားနိုင်ငံခြားရေး၀န်ကြီး ပရက်ဆိုခွန်ဟာ မတ်လ ၂၁-၂၃ ခရီးစဥ်အတွင်း အာဏာသိမ်းစစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင်နဲ့သာ တွေ့ဆုံဖို့ရှိပြီး၊ အတိုက်အခံ အထူးသဖြင့် ဖြုတ်ချခံလိုက်ရတဲ့ NLD ပါတီက တာ၀န်ရှိသူတွေနဲ့ တွေဆုံခွင့်ရမယ့် အနေအထားမျိုး မရှိပါဘူး။ 

“အထူးကိုယ်စားလှယ်ရဲ့ ပထမဆုံး မြန်မာနိုင်ငံခရီးစဥ်ဟာ အကြမ်းဖက်မှု ရပ်တန့်ရေး၊ သက်ဆိုင်သူတွေအားလုံး အတ်နိုင်ဆုံး ထိန်းချုပ်ဆောင်ရွက်နိုင်ရေး အဆင်ပြေမယ့် အခြေအနေတစ်ခု ဖန်တီးဖို့ ရည်ရွယ်ပါတယ်” လို့ ကမ္ဘောဒီးယား နိုင်ငံခြားရေး၀န်ကြီးဌာနရဲ့ ပြောရေးဆိုခွင့်ရှိသူ ချမ် ဆူနရီက ပြောပါတယ်။ 

အာဆီယံ သဘောတူညီချက် ၅ ချက်ပါ အထူးကိုယ်စားလှယ် မြန်မာနိုင်ငံကို သွားရောက်မယ့် ရည်ရွယ်ချက်ဟာ မြန်မာ့နိုင်ငံရေးအသိုင်းအ၀ိုင်းက သက်ဆိုင်သူတွေနဲ့ တွေ့ဆုံဆွေးနွေးဖို့ ဖြစ်ပါတယ်။ 

ခရီးစဥ်အတွင်း ဘယ်သူတွေနဲ့ တွေ့ဆုံမလဲဆိုတာ မပြောလိုသေးဘူးလို့လည်း ဆူနရီက ပြောပါတယ်။ 

“ရည်ရွယ်ချက် အောင်မြင်ဖို့ဆိုတာ စိန်ခေါ်မှုတွေအများကြီး ကျော်ဖြတ်သွားရမယ့် ခရီးရှည်ကြီးပါ။ ဒါပေမယ့် ခရီးရှည်ကြီးကို ပထမဆုံးခြေလှမ်းတစ်လှမ်းနဲ့ စတင်ရတာ ဖြစ်ပါတယ်”

Ref: The Star