ပိုလန်ခရီးစဥ်တွင် ပူတင်ကို ဖြုတ်ချရန်ပါ ကန်သမ္မတပြောလာ

မတ် ၂၇၊ ၂၀၂၂

M-Media

-ရုရှားသမ္မတ ဗလာဒီမီရ် ပူတင်ဟာ သားသတ်သမား တစ်ယောက်ဖြစ်ပြီး အာဏာဆက်ရှိနေလို့ မဖြစ်တော့ဘူးလို့ အမေရိကန်သမ္မတ ဂျိုးဘိုင်ဒန်က ပြောကြားလိုက်ပါတယ်။ 

နေတိုးအဖွဲ့၀င်ဖြစ်ပြီး ယူကရိန်းနဲ့ကပ်နေတဲ့ ပိုလန်နိုင်ငံကို ဘိုင်ဒန် ရောက်ရှိနေတာ ဖြစ်ပါတယ်။ နေတိုးအဖွဲ့ ပိုင်နက်ကို တစ်လက်မမှ မကျူးကျော်မိစေဖို့လည်း ဘိုင်ဒန်က ပူတင်ကို ထပ်မံသတိပေးခဲ့ပါတယ်။ 

ယူကရိန်းဟာ ရုရှားအတွက် အောင်ပွဲဒေသ ဘယ်တော့မှ ဖြစ်မှာမဟုတ်ကြောင်း၊ ပူတင်တစ်ယောက် အာဏာဆက်ရှိနေလို့ မရတော့ကြောင်းလည်း ဘိုင်ဒန်က ထည့်သွင်းပြောဆိုခဲ့ပါတယ်။ 

အိမ်ဖြူတော်ကတော့ ဘိုင်ဒန်ရဲ့မှတ်ချက်ဟာ ရုရှားမှာ အစိုးရပြောင်းလဲဖို့ တိုက်တွန်းဆော်သြတာ မဟုတ်ဘူးလို့ နောက်ပိုင်းမှာ ထုတ်ပြန်ပါတယ်။ 

ရုရှားအစိုးရကိစ္စမှာ ဘိုင်ဒန်အနေနဲ့ ဘာဆုံးဖြတ်ချက်မှ ပေးစရာမလိုဘဲ ရုရှားသမ္မတကို ရုရှားပြည်သူတွေကသာ ရွေးကောက်တင်မြှောက်တာဖြစ်ကြောင်း ပူတင်ရဲ့ရုံးက တုန့်ပြန်ခဲ့ပါတယ်။ 

ယူကရိန်းကို ရုရှားက ကျူးကျော်တိုက်ခိုက်မှုမှာ အမေရိကန်က ယူကရိန်းဖက်ကို စစ်လက်နက်ပစ္စည်းထောက်ပံ့မှုတွေ ပိုမိုလုပ်ဆောင်လာသလို၊ ရုရှားကိုလည်း ပြင်းပြင်းထန်ထန် ၀ေဖန်မှုတွေ ဆက်တိုက်ပြုလုပ်လာပါတယ်။ 

Ref: Aljazeera