တာလီဘန်က ပြည်သူများအပေါ် ဖိနှိပ်ချုပ်ခြယ်မှုများ ထပ်တိုးလုပ်ဆောင်

မတ် ၂၈၊ ၂၀၂၂

M-Media 

-အမျိုးသမီးတွေကို တစ်ယောက်တည်း လေယာဥ်စီးခွင့် မပေးတာအပါအ၀င် တာလီဘန်က အာဖဂန်ပြည်သူတွေအပေါ် ကန့်သတ်ချုပ်ခြယ်မှုတွေ ထပ်တိုး လုပ်ဆောင်လိုက်ပါတယ်။ 

ဘီဘီစီက သတင်းတွေကို မလွှင့်ဖို့ ပြည်တွင်းသတင်းဌာနတွေကို ညွှန်ကြားတာ၊ အမျိုးသားနဲ့ အမျိုးသမီးတွေ တွဲပြီး ပန်းခြံတွေမှာ သွားရောက်လည်ပတ်မှု ပိတ်ပင်တာ၊ အစိုးရ၀န်ထမ်းတွေမှာ အမျိုးသားတွေ မုတ်ဆိတ်မထားမနေရ၊ ဦးထုပ် ဒါမှမဟုတ် ခေါင်းပေါင်း မဆောင်းမနေရ၊ သတ်မှတ်ထားတဲ့ ၀တ်စုံကို မ၀တ်မနေရ စတာတွေ ပါ၀င်ပါတယ်။ 

ပြီးခဲ့တဲ့နှစ် သြဂုတ်လက အာဖဂန်နစ္စတန်ကို ပြန်လည်သိမ်းပိုက်ခဲ့တဲ့ တာလီဘန်ဟာ အမျိုးသမီးတွေကို ကျောင်းတက်ခွင့်မပေးတာ၊ အစိုးရဌာနတွေမှာ အလုပ်လုပ်ခွင့်မပေးတာ စတဲ့ ကန့်သတ်မှုတွေ လုပ်ဆောင်ထားတာပါ။ 

ပြီးခဲ့တဲ့ရက်ပ်ိုင်း ပြည်တွင်း လေကြောင်းလိုင်းတွေကို ပေးပို့တဲ့ ညွှန်ကြားစာမှာတော့ အုပ်ထိန်းသူ အမျိုးသားတစ်ဦးမပါ၀င်ရင် အမျိုးသမီးတွေကို လေယာဥ်စီးခွင့်မပြုဖို့ အမိန့်ပေးထားပါတယ်။ 

အစိုးရ၀န်ထမ်းတွေ မုတ်ဆိတ်ထားမထား၊ သတ်မှတ်၀တ်စုံ ၀တ်မ၀တ်ကို တာလီဘန်အာဏာပိုင်တွေက ရှောင်တစ်ခင်၀င်ရောက်စစ်ဆေးတာမျိုး တနင်္လာနေ့က စတင်ပြုလုပ်နေပြီး မလိုက်နာရင် ၀င်ခွင့်မပေးတာ၊ အလုပ်ဖြုတ်တာတွေအထိ လုပ်မယ်လို့ သတိပေးထားပါတယ်။ 

ပန်းခြံတွေမှာ တရား၀င် လက်ထပ်ထားတဲ့ စုံတွဲတွေ၊ ဆွေမျိုးသားချင်းတွေ၊ မိသားစုတွေတောင် အမျိုးသား၊ အမျိုးသမီး အတူသွားရောက်ခွင့် မပေးဘဲ၊ အမျိုးသမီးတွေအတွက် ၃ ရက်၊ အမျိုးသားတွေအတွက် ၄ ရက် တာလီဘန်က ရက်သတ်မှတ်ထားပါတယ်။ 

Ref: AP