ဘာသာရေးခေါင်းစဥ်တပ် အကြမ်းဖက်မှုအတွက် လူ ၆ ဦးကို ပါကစ္စတန်က သေဒဏ်ချ

ဧပြီ ၁၉၊ ၂၀၂၂

M-Media 

-ဘာသာရေးစော်ကားတယ်ဆိုတဲ့ ခေါင်းစဥ်တပ်ပြီး သီရိလင်္ကာ နိုင်ငံသားတစ်ဦးကို လူအုပ်နဲ့သတ်ဖြတ်မှုမှာ ပါ၀င်သူ ၆ ဦးကို ပါကစ္စတန်က သေဒဏ်ချမှတ်လိုက်ပါတယ်။

ဒီအဖြစ်အပျက်အတွက် လူ ၈၈ ဦးကို ပါကစ္စတန်တရားရုံးက ပြစ်ဒဏ်ပေးခဲ့ပြီး ၉ ဦးကို တစ်သက်တစ်ကျွန်း၊ ကျန်တဲ့သူတွေကို ထောင်ဒဏ် ၂ နှစ်ကနေ ၅ နှစ်အထိ အသီးသီး ချမှတ်ခဲ့တာ ဖြစ်ပါတယ်။  

ပြီးခဲ့တဲ့နှစ် ဒီဇင်ဘာက ဆီယာကော့မြို့မှာ အသက် ၄၈ နှစ်အရွယ် စက်ရုံမန်နေဂျာဟာ လူအုပ်စုရဲ့ ရိုက်နှက်သတ်ဖြတ်မှုကို ခံခဲ့ရတာဖြစ်ပါတယ်။ 

ဘာသာရေးစော်ကားတဲ့အနေနဲ့ တမန်တော်မိုဟာမက်အမည် ပါ၀င်တဲ့ ပိုစတာကို မန်နေဂျာက ဆုတ်ဖြဲခဲ့တယ်ဆိုတဲ့ သတင်းတွေ ထွက်ခဲ့ပြီးတဲ့နောက် သတ်ဖြတ်မှု ဖြစ်ပွားခဲ့တာပါ။ 

ပါကစ္စတန်အာဏာပိုင်တွေနဲ့ အစ္စလာမ်ဘာသာရေးခေါင်းဆောင်တွေက ဒီလိုစော်ကားမှု တကယ်ဖြစ်ခဲ့တာမဟုတ်ဘဲ မန်နေဂျာကို မကျေနပ်တဲ့ အလုပ်သမားတစ်ချို့က ချောက်ချခဲ့တာလို့ စုံစမ်းစစ်ဆေးမှုရလဒ်တွေကို ကိုးကားပြီး နောက်ပိုင်းမှာ ထုတ်ပြန်ပါတယ်။

အဲဒီအချိန်က ပါကစ္စတန်၀န်ကြီးချုပ်ဖြစ်တဲ့ အင်မရန်းခန်းက ဒီသတ်ဖြတ်မှုဟာ နိုင်ငံအတွက် အရှက်ရစရာ နေ့တစ်နေ့ဖြစ်တယ်လို့ ရှုတ်ချခဲ့ပါတယ်။

Ref: BBC