နိုင်ငံသားဖြစ်မှုကို လက်နက်အဖြစ် အသုံးချနေတဲ့ စစ်ကောင်စီ

ဧပြီ ၂၀၊ ၂၀၂၂

M-Media

– စစ်ကောင်စီဟာ မတ်လကစတင်ပြီး သူတို့ကိုဆန့်ကျင်သူ၊ ၀ေဖန်သူ၊ လက်နက်ကိုင်တော်လှန်ရေးကို ထောက်ခံသူ၊ ခိုင်းတဲ့အတိုင်းမလုပ်တဲ့ သံအမတ်တွေ အနည်းဆုံး ၃၃ ယောက်ကို နိုင်ငံသားအဖြစ်ကနေ ပယ်ဖျက်ခဲ့ပါတယ်။ 

‘နိုင်ငံတော်အကျိုးစီးပွားကို ထိခိုက်စေတဲ့အတွက်’ နိုင်ငံသားအဖြစ်ကနေ ရပ်စဲတာလို့ စစ်ကောင်စီမီဒီယာတွေက ထုတ်ပြန်ပါတယ်။ 

ဗိုလ်ချုပ်အောင်ဆန်းဦးဆောင်တဲ့ လွတ်လပ်ရေးခေါင်းဆောင်တွေ ရေးဆွဲပြဌာန်းတဲ့ ၁၉၄၇ နိုင်ငံသားဥပဒေကို ပယ်ဖျက်ပြီး မြန်မာစစ်အာဏာရှင်တွေရဲ့ ခေါင်းကိုင်ဖခင် ဦးနေ၀င်းရေးဆွဲတဲ့ ၁၉၈၂ ခုနှစ် နိုင်ငံသားဥပဒေဟာ နိုင်ငံတကာ စံချိန်စံညွှန်းတွေနဲ့ မညီဘဲ အာဏာရှင်တွေ လုပ်ချင်တာ လုပ်ဆောင်လို့ရတဲ့ ဥပဒေတစ်ခုသာ ဖြစ်တယ်လို့ ပညာရှင်တွေက အရင်ကတည်းက ၀ေဖန်ထားကြတာပါ။ 

အခုတော့ အာဏာသိမ်းစစ်ကောင်စီဟာ ၁၉၈၂ ခုနှစ် နိုင်ငံသားဥပဒေကို အသုံးပြုပြီး အတိုက်အခံတွေအပေါ် ဖိနှိပ်မှုတွေ လုပ်ဆောင်လာပြီဖြစ်ပါတယ်။ 

လူ့အခွင့်အရေးစောင့်ကြည့်အဖွဲ့  Human Rights Watch ရဲ့ လက်ထောက်ဒါရိုက်တာ ဖီလ်ရော်ဘတ်ဆန်က စစ်ကောင်စီဟာ နိုင်ငံသားဖြစ်မှုကို လက်နက်တစ်ခုသဖွယ် အသုံးပြုနေတယ်လို့ ပြောကြားခဲ့ပါတယ်။ 

“၁၉၀၀ ပြည့်နှစ်တွေနဲ့ ၂၀၀၀ ပြည့်နှစ်အစောပိုင်းကာလတွေက ဒီမိုကရေစီအရေး လှုပ်ရှားမှုအတွင်း ပါ၀င်ခဲ့သူတွေထဲမှာ နိုင်ငံသားဖြစ်ခွင့် ပြန်မရတဲ့ တက်ကြွလှုပ်ရှားသူတွေ တော်တော်များများ ရှိပါတယ်” 

Amnesty International အဖွဲ့က သုတေသနဆိုင်ရာ အကြီးအကဲ အီမာလင် ဂီလ်က နိုင်ငံသားဖြစ်မှုကို ရပ်ဆိုင်းတာဟာ နိုင်ငံမဲ့ဖြစ်သွားစေတဲ့အတွက် ဒီလုပ်ရပ်ဟာ နိုင်ငံတကာ ဥပဒေနဲ့ မညီဘူးလို့ ထောက်ပြပါတယ်။ 

စစ်ခေါင်းဆောင်တွေဟာ အတိုက်အခံတွေကို နှိပ်ကွပ်ဖို့ဆိုရင် တရားမ၀င်နည်းလမ်းတွေ၊ ရက်စက်ကြမ်းကြုတ်တဲ့နည်းလမ်းတွေကို ဘယ်လောက်ပဲအသုံးပြုရပြုရ အသုံးပြုမယ်ဆိုတဲ့ သဘောထားကို ဒီလုပ်ရပ်က ပြသနေကြောင်း သူမက ထည့်သွင်းပြောကြားခဲ့ပါတယ်။ 

စစ်တပ်ဟာ နိုင်ငံအနောက်ပိုင်းက ရိုဟင်ဂျာမွတ်စလင်တွေကို ၁၉၈၂ ခုနှစ် နိုင်ငံသားဥပဒေအသုံးပြုကာ အကြီးအကျယ်နှိပ်ကွပ်ခဲ့တာ ဖြစ်ပါတယ်။

Ref: Aljazeera