အဟ်မဒ် မာနက်စရာ (သို့) ပါလက်စတိုင်းကလေးများ၏ လက်တွေ့ဘ၀ကို ထင်ဟင်စေသူ

ဧပြီ ၂၁၊ ၂၀၂၂

M-Media 

-အစ္စရေးက ပါလက်စတိုင်းကလေးငယ်တွေအပေါ်  ရက်စက်ကြမ်းကြုတ်မှုပေါင်းများစွာ ကျူးလွန်နေပြီး အဲဒီအထဲမှာ အဟ်မဒ် မာနက်စရာရဲ့ အဖြစ်အပျက်ဟာ နိုင်ငံတကာအသိုင်းအ၀ိုင်းရဲ့ အာရုံစိုက်မှုကို အထူးရတဲ့ကိစ္စတစ်ခု ဖြစ်ပါတယ်။ 

မာနက်စရာဟာ အစ္စရေးက ကျူးကျော်သိမ်းပိုက်ထားတဲ့ ပါလက်စတိုင်းပိုင် အရှေ့ဂျေရုစလင်မှာ ၂၀၁၅ ခုနှစ်က ၀မ်းကွဲအစ်ကိုဖြစ်သူ ဟာဆန်နဲ့ လမ်းသွားစဥ် ဂျူးအခြေ နေထိုင်သူတွေရဲ့ တိုက်ခိုက်မှုကို ခံခဲ့ရတာဖြစ်ပါတယ်။ 

အရှေ့ဂျေရုစလင်က အစ္စရေးရဲ့ တရားမ၀င်အိမ်ယာမှာ နေထိုင်တဲ့ အခြေချနေထိုင်သူ ၂ ဦးကို ဓားနဲ့ထိုးတယ်လို့ စွပ်စွဲကာ ဟာဆန်ကို ဂျူးအရပ်သားတွေက သေနတ်နဲ့ နေရာတင်ပစ်သတ်ခဲ့ပြီး မာနက်စရာကိုတော့ လူအုပ်စုက ၀ိုင်းရိုက်တာ ကားနဲ့၀င်တိုက်တာတွေ လုပ်ခဲ့ပါတယ်။ 

ဒီတိုက်ခိုက်မှုဒဏ်ကြောင့် မာနက်စရာတစ်ယောက် ဦးခေါင်းကွဲအက်ပြီး၊ သွေးယိုကာ နောက်ပိုင်းမှာ ရူးတဲ့အထိ ဆိုးရွားသွားခဲ့ပါတယ်။ 

အဲဒီအချိန်က ၁၃ နှစ်သာရှိသေးတဲ့ မာနက်စရာဟာ ဂျူးအခြေချနေထိုင်သူတွေ စွပ်စွဲတဲ့ တိုက်ခိုက်မှုမှာ မပါ၀င်ပေမယ့် အစ္စရေးက ဖမ်းဆီးပြီး အသက် ၁၄ နှစ်ရောက်တဲ့အချိန် ၂၀၁၆ ခုနှစ်မှာ တရားစွဲဆိုကာ ထောင် ၁၂ နှစ်ချခဲ့ပါတယ်။ 

အစ္စရေးဟာ အဲဒီကိစ္စနောက်ပိုင်း အသက် ၁၄ နှစ်အောက် ပါလက်စတိုင်း ကလေးငယ်တွေကို စစ်ခုံရုံးတင်ပြီး ပြင်းပြင်းထန်ထန် အပြစ်ပေးနိုင်ဖို့ ဥပဒေတွေကို ပြင်ဆင်ခဲ့ပါတယ်။ 

စိတ်ရောဂါခံစားနေရတဲ မာနက်စရာဟာ ထောင်ထဲမှာ တိုက်ပိတ်လည်း ခံခဲ့ရပါတယ်။ ဒီအကြောင်းကို ၂၀၂၁ ခုနှစ် ဒီဇင်ဘာလ နယ်စည်းမခြား ဆရာ၀န်များအဖွဲ့က ဆရာ၀န်တွေ ထောင်ထဲ၀င်တွေ့ခွင့်ရတဲ့အချိန်မှ သိခဲ့ရတာပါ။ 

ကလေးဘ၀ကတည်းက လူအုပ်ရဲ့ ရိုက်နှက်မှု၊ ကားနဲ့၀င်တိုက်မှု၊ အစ္စရေးရဲ့ ပြင်းထန်တဲ့ အပြစ်ပေးညှင်းပမ်းမှုကို ခါးစည်းခံခဲ့ရတဲ့ မာနက်စရာကို လွှတ်ပေးရေး နိုင်ငံတကာရဲ့ တောင်းဆိုမှုဟာ အခုနှစ် မတ်လအတွင်းမှာ ပိုမိုကျယ်လောင်လာခဲ့ပါတယ်။ 

ဒါပေမယ့် အစ္စရေးကတော့ အသက် ၂၁ နှစ်အရွယ် မာနက်စရာကို အခုအချိန်အထိ ထောင်ချထားဆဲဖြစ်ပါတယ်။ 

မာနက်စရာရဲ့အဖြစ်အပျက်ဟာ တိုင်းပြည်အခိုးခံရပြီး ညှင်းပမ်းနှိပ်စက်မှုပါ ခံနေရတဲ့ ပါလက်စတိုင်းကလေးငယ်တွေရဲ့ လက်တွေ့ဘ၀ကို ထင်ဟပ်နေတာလည်း ဖြစ်ပါတယ်။

Ref: Aljazeera