ထိုင်၀မ်မုန်းတီးစိတ်ကြောင့် ဘုရားကျောင်းကို၀င်ပစ်မှု အမေရိကန်တွင် ဖြစ်ပွား

မေ ၁၇၊ ၂၀၂၂

M-Media 

-ကယ်လီဖိုးနီးယားပြည်နယ်မှာ တနင်္ဂနွေနေ့က ဖြစ်ပွားတဲ့ ခရစ်ယာန်ဘုရားကျောင်းကို တိုက်ခိုက်မှုဟာ ထိုင်၀မ်မုန်းတီးစိတ်ကို အခြေခံတာလို့ အမေရိကန်ရဲတပ်ဖွဲ့က ထုတ်ပြန်ပါတယ်။ 

အမေရိကန်နိုင်ငံသား တရုတ်လူမျိုး အသက် ၆၈ နှစ်အရွယ် အမျိုးသား ဒေးဗစ်ချူဟာ လာဂူးနား၀ုဒ်မြို့က Geneva Presbyterian ဘုရားကျောင်းထဲ သေနတ်နဲ့ ၀င်ရောက်ပစ်ခတ်မှုမှာ တစ်ဦးသေဆုံးပြီး ၅ ဦး ဒဏ်ရာရခဲ့ပါတယ်။ 

တရုတ်နဲ့ ထိုင်၀မ်တို့အကြား လတ်တလောဖြစ်နေတဲ့ တင်းမာမှုတွေကို အခြေခံပြီး ဖြစ်လာတဲ့ ထိုင်၀မ်မုန်းတီးစိတ်ကြောင့် ချူဟာ ဒီလိုကျူးလွန်တာဖြစ်ကြောင်း တွေ့ရတယ်လို့ ဒေသခံရဲတပ်ဖွဲ့က သတင်းထုတ်ပြန်ပါတယ်။ 

တရုတ်က ထိုင်၀မ်ဟာ သူတို့ပိုင်တဲ့ နယ်မြေတစ်ခုဖြစ်ပြီး လိုအပ်ရင် အင်အားသုံးသိမ်းပိုက်သွားမယ်လို့ တရား၀င် ထုတ်ဖော်ပြောဆိုထားတာပါ။ ထိုင်၀မ်ကတော့ သူတို့ဟာ သီးခြား ဒီမိုကရက်တစ် နိုင်ငံတစ်ခုသာဖြစ်တယ်လို့ ဆိုပါတယ်။ 

စနေနေ့ကလည်း နယူးယောက်မြို့ ဘက်ဖလိုးမြို့နယ်က စူပါမားကတ်တစ်ခုမှာ အသက် ၁၈ နှစ်အရွယ် လူဖြူတစ်ဦးက သေနတ်နဲ့ ၀င်ရောက်ပစ်ခတ်ခဲ့တာကြောင့် လူ ၁၀ ဦး သေဆုံးပြီး ၃ ဦး ဒဏ်ရာရခဲ့ပါတယ်။ ရဲတပ်ဖွဲ့က ဒီပစ်ခတ်မှုဟာ လူမည်းမုန်းတီးမှုကနေ ပေါ်ပေါက်လာတာဖြစ်တယ်လို့ ထုတ်ပြန်ထားပါတယ်။

Ref: Reuters