လက်နက်ကိုင်တော်လှန်ရေးအဖွဲ့တွေကို မြန်မာစစ်တပ် နိုင်အောင်မတိုက်နိုင်တော့

ဇွန် ၁၂၊ ၂၀၂၂
M-Media

-မြန်မာစစ်တပ်ဟာ လက်နက်ကိုင်တော်လှန်ရေးအဖွဲ့တွေကို နိုင်အောင် တိုက်နိုင်မှာ မဟုတ်တဲ့အတွက် ဒီမိုကရေစီ ပြန်လည်ဖော်ဆောင်သင့်တယ်လို့ ‌အမေရိကန်အစိုးရ အကြံပေးတစ်ဦးဖြစ်တဲ့ ဒဲရစ် ရှိုလတ်က ပြောကြားလိုက်ပါတယ်။

“သူတို့နိုင်မယ်လို့ ထင်နေတာမျိုး မြင်ရတော့ ပြောရတော်တော်ခက်တယ်ဗျ။ စစ်တပ်က နယ်မြေတွေ ဆုံးရှုံးနေသလို တော်တော်လေးလည်း အထိနာနေပါတယ်”

ဒဲရစ်ဟာ စင်ကာပူမှာလုပ်တဲ့ Shangri-La လုံခြုံရေးဆိုင်ရာ အစည်းအဝေးမှာ မြန်မာစစ်တပ်နဲ့ပတ်သက်ပြီး မှတ်ချက်ပေးရာ အာဏာသိမ်းစစ်တပ်ကို ပေါ်ပေါ်ထင်ထင်ပဲ ဝေဖန်ခဲ့တာဖြစ်ပါတယ်။

သောကြာနေ့ ထိုင်းနိုင်ငံ ဘန်ကော်မြို့မှာ ဂျာနယ်လစ်တစ်ဦးရဲ့ မေးမြန်မှုမှာလည်း စစ်တပ်ဟာ ပြည်ပမှာသာ မကဘဲ ပြည်တွင်းမှာလဲ ဖယ်ကျဉ်ခံနေရပြီး တိုက်ခိုက်မှုတွေကို ရပ်ဆိုင်းကာ ဒီမိုကရေစီ ပြန်လည်ဖော်ဆောင်သင့်တယ်လို့ ဖြေကြားခဲ့ပါတယ်။

ဒဲရစ်ရဲ့ ဒီပြောကြားချက်အတွက် ရိုက်တာသတင်းဌာနရဲ့ ဆက်သွယ်မေးမြန်းမှုကို စစ်ကောင်စီ ပြောရေးဆိုခွင့်ရှိသူက ပြန်လည်ဖြေကြားခြင်း မပြုပါဘူး။
ပြီးခဲ့တဲ့လက အမေရိကန်-အာဆီ‌ယံ ထိပ်သီးအစည်းအဝေးနောက်ပိုင်း ဒဲရစ်ဟာ ထိုင်း၊ စင်ကာပူနဲ့ ဘရူနိုင်း နိုင်ငံတွေကို သွားရောက်ကာ နောက်ဆက်တွဲအစည်းအဝေးတွေကို တက်ရောက်ခဲ့တာ ဖြစ်ပါတယ်။

အာဏာသိမ်း မြန်မာစစ်တပ်ကို ပိတ်ဆို့အရေးယူမှုတွေ လုပ်ဆောင်တာအပြင် စင်ကာပူ၊ အင်ဒိုနီးရှား၊ မလေးရှားနိုင်ငံတွေနဲ့ ဆက်သွယ်ကာ မြန်မာ့အရေး ပူးပေါင်းဆောင်ရွက်မှာဖြစ်ကြောင်း၊ မြန်မာကိစ္စမှာ တရုတ်က အဖြေရှာရေး တစ်စိတ်တစ်ပိုင်းအဖြစ် ပါဝင်ရမှာဖြစ်ကြောင်း ဒဲရစ်က ထည့်သွင်းပြောဆိုခဲ့ပါတယ်။

Ref: Reuters