ဗီယက်နမ်၏ ၃ လပတ် စီးပွားရေးတိုးတက်မှု ၁၁ နှစ်အတွင်း အမြင့်ဆုံးရောက်

ဇွန် ၂၉၊ ၂၀၂၂
M-Media

-ကိုဗစ်နောက်ပိုင်း ဗီယက်နမ်နိုင်ငံရဲ့ ၃ လပတ်စီးပွားရေး တိုးတက်မှုဟာ ၁၁ နှစ်အတွင်း အမြင့်ဆုံးကို ရောက်လာပါတယ်။

အခုနှစ် ဧပြီလကနေ ဇွန်လအတွင်း ဗီယက်နမ်ရဲ့ GDP ဟာ ၇.၇၂ အထိ မြင့်တက်ခဲ့ပြီး၊ ပို့ကုန်ကနေ ရရှိတဲ့ ၀င်ငွေကလည်း ၂၁ ရာခိုင်နှုန်း မြင့်တက်ကာ ကန်ဒေါ်လာ ၉၆.၈ ဘီလီယံ ရှိလာပါတယ်။

ဗီယက်နမ်ဟာ အာရှမှာ ကုန်ထုတ်လုပ်မှု အချက်အခြာနိုင်ငံတစ်ခု ဖြစ်လာပြီး ကိုဗစ်ဖြစ်တဲ့ ပြီးခဲ့တဲ့ ၂ နှစ်တာကာလအတွင်းမှာတောင် GDP ဟာ နှစ်စဥ် ၃ ရာခိုင်နှုန်း ပုံမှန် ရှိခဲ့ပါတယ်။

အခုနှစ် နှစ်၀က် စီးပွားရေးတိုးတက်မှုဟာ ၆.၄၂ ရာခိုင်နှုန်းရှိခဲ့ပြီး ကိုဗစ်ကပ်ရောဂါမဖြစ်ခင် ၂၀၁၉ ခုနှစ်က ရှိခဲ့တဲ့ ၇ ရာခိုင်နှုန်းနဲ့ သိပ်မကွာတော့ဘူး။

ဗီယက်နက် စာရင်းအင်း၀န်ကြီးဌာနက ငွေကြေးဖောင်းပွမှု၊ လောင်စာဆီစျေးတက်မှုနဲ့ သွင်းကုန်စျေးကြီးမြင့်မှုတို့ကို သတိထားဖို့ အစိုးရကို တိုက်တွန်းခဲ့ပါတယ်။

ကိုဗစ်ကာလ ၂ နှစ်တာပိတ်ထားပြီးတဲ့နောက် မတ်လအလယ်ပိုင်းမှာ ဗီယက်နမ်က နိုင်ငံကို ပြန်ဖွင့်ခဲ့ပြီး အာဏာပိုင်တွေကလည်း ၄ နှစ်အတွင် ဂျီဒီပီ ၆.၅ ရာခိုင်နှုန်း တိုးတက်လာဖို့ ရည်ရွယ်လုပ်ဆောင်နေပါတယ်။

Ref: CNA