အာဆီယံ နိုင်ငံခြားရေး၀န်ကြီးများအစည်းအ၀ေးကို စစ်ကောင်စီက တက်ခွင့်မရ

ဇူလိုင် ၈၊ ၂၀၂၂
M-Media

-ဇူလိုင်လအကုန်မှာ ကျင်းပမယ့် အာဆီယံ နိုင်ငံခြားရေး၀န်ကြီးများ အစည်းအ၀ေးမှာ စစ်ကောင်စီခန့် နိုင်ငံခြားရေး၀န်ကြီးကို တက်ခွင့်ပေးမှာ မဟုတ်ဘူးလို့ အာဆီယံက ထုတ်ပြန်ပါတယ်။

၂၀၂၁ ခုနှစ် အာဏာသိမ်းပြီးနောက်ပိုင်း ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး အာဆီယံ သဘောတူညီချက် ၅ ရပ်ကို စစ်ကောင်စီက အကောင်အထည်မဖော်တဲ့အတွက် ထိပ်သီးအစည်းအ၀ေးတွေမှာ အာဆီယံက စစ်ကောင်စီကို ၀ိုင်းကျဥ်ထားတာ ဖြစ်ပါတယ်။

အခုနှစ် အာဆီယံဥက္ကဌ ကမ္ဘောဒီယား၀န်ကြီးချုပ် ဟွန်ဆန်က စစ်ကောင်စီကို အစည်းအ၀ေးတွေမှာ ဖိတ်ဖို့ ကြိုးစားပေမယ့် ကျန်တဲ့ အာဆီယံနိုင်ငံတွေက လက်မခံပါဘူး။

ဇူလိုင် ၃၀ ရက်နေ့ကနေ သြဂုတ် ၆ ရက်နေ့အထိ ကျင်းပမယ့် ၅၅ ကြိမ်မြောက် အာဆီယံ နိုင်ငံခြားရေး၀န်ကြီးများအစည်းအ၀ေးမှာလည်း စစ်ကောင်စီခန့် နိုင်ငံခြားရေး၀န်ကြီး ဦး၀ဏ္ဏမောင်လွင် တက်ရောက်ခွင့်ရမှာ မဟုတ်ပါဘူး။

ကမ္ဘောဒီးယားနိုင်ငံခြားရေး၀န်ကြီး ပရက်ဆိုခွန်က ဦး၀ဏ္ဏမောင်လွင်ကို ပေးပို့တဲ့စာမှာ မြန်မာ့အရေး ဖြေရှင်းဖို့ အာဆီယံ သဘောတူညီချက် ၅ ရပ်ကို အကောင်အထည်ဖော်တာမျိုး မရှိဘူးဆိုရင် အဖွဲ့၀င်နိုင်ငံအားလုံးရဲ့ သဘောဆန္ဒအတိုင်း အစည်းအ၀ေးကို တက်ခွင့်ပေးမှာမဟုတ်ဘူးလို့ ဖော်ပြထားပါတယ်။

နိုင်ငံရေးဖက်ကမဟုတ်တဲ့ စစ်ကောင်စီကိုယ်စားလှယ်တစ်ဦးကိုတော့ အာဆီယံက တက်ခွင့်ပြုမှာ ဖြစ်ပါတယ်။

Ref: Reuters