တရုတ်စောင့်ကြည့်ကင်မရာများဖြင့် စစ်ကောင်စီက ပြည်သူများကို စောင့်ကြည့် ထိန်းချုပ်မည်

ဇူလိုင် ၁၂၊ ၂၀၂၂
M-Media

-မျက်နှာပုံရိပ်တွေကို ဖမ်းယူခွဲခြားဖော်ထုတ်နိုင်မယ့် တရုတ်ထုတ် စောင့်ကြည့်ကင်မရာတွေကို မြို့ကြီးတွေမှာ စစ်ကောင်စီက တပ်ဆင်ဖို့ စီစဥ်နေတယ်လို့ သတင်းထွက်လာပါတယ်။

ရှင်ကျန်းနဲ့ တိဘက်က လူမျိုးစုတွေကို စောင့်ကြည့်ကင်မရာတွေတပ်ပြီး ဖိနှိပ်ချုပ်ခြယ်မှုတွေလုပ်တဲ့အတွက် တရုတ်ကို နိုင်ငံတကာက အကြီးအကျယ် ၀ေဖန်နေကြတာ ဖြစ်ပါတယ်။

မြန်မာအာဏာသိမ်းစစ်ကောင်စီကလည်း မြို့ကြီးတွေမှာ ဒီလိုကင်မရာတွေ တပ်ဆင်ဖို့ စီစဥ်နေတယ်လို့ ဒီကိစ္စနဲ့ နီးစပ်တဲ့ သတင်းရင်းမြစ် ၃ ခုက ပြောပါတယ်။

လက်ရှိမှာ နည်းပညာကုမ္ပဏီ ၃ ခုဖြစ်တဲ့ Huawei, Zhejiang Dahua Technology (Dahua) နဲ့ Hikvision ထံကနေ စောင့်ကြည့်ကင်မရာတွေ ၀ယ်ယူဖို့အတွက် ရန်ကုန်အခြေစိုက် ကုမ္ပဏီ ၂ ခု (Fisca Security & Communication၊ Naung Yoe Technologies Co)က တင်ဒါရထားပါတယ်။

စစ်ကောင်စီဖက်ကလူတွေကတော့ လုံခြုံရေးနဲ့ တည်ငြိမ်အေးချမ်းရေးအတွက် လုပ်ဆောင်တာဖြစ်တယ်လို့ ပြောပါတယ်။

၂၀၂၁ ခုနှစ် အာဏာသိမ်းပြီးနောက်ပိုင်း စစ်ကောင်စီဟာ မော်လမြိုင်အပါအ၀င် မြို့ကြီး ၅ ခုမှာ စောင့်ကြည့်ကင်မရာတွေ ပိုမိုတပ်ဆင်လာတာပါ။

အခုအစီအစဥ်ကတော့ တိုင်းနဲ့ ပြည်နယ်မြို့တော်တိုင်းမှာ တပ်ဆင်ဖို့ ဖြစ်ပါတယ်။

ဒီစီမံကိန်းမှာ ပါ၀င်နေတဲ့ မြန်မာကုမ္ပဏီတွေနဲ့ တရုတ်နည်းပညာ ကုမ္ပဏီတွေကတော့ ရိုက်တာသတင်းဌာနရဲ့ မေးမြန်းမှုကို ပြန်လည်ဖြေကြားခြင်း မပြုပါဘူး။

Hikvision က သူတို့ရဲ့ နည်းပညာနဲ့ ဆက်စပ်ပစ္စည်းတွေကို မြန်မာစစ်အစိုးရထံ တိုက်ရိုက်ရောင်းချတာမျိုး မရှိသလို၊ မျက်နှာစောင့်ကြည့်ခွဲခြားဖော်ထုတ်နိုင်မယ့် နည်းပညာမျိုး မြန်မာနိုင်ငံကို ရောင်းချတာမျိုး မရှိဘူးလို့လည်း ဆိုပါတယ်။

တရုတ် ကုမ္ပဏီထုတ် ဆော့ဖ်၀ဲတွေ စျေးကြီးတာကြောင့် တင်ဒါရတဲ့ ကုမ္ပဏီတွေဟာ ပြည်တွင်းနဲ့ ဒေသတွင်းက နည်းပညာတွေ အသုံးပြုတာမျိုး ရှိတယ်လို့ သတင်းရင်းမြစ်တွေက ပြောပါတယ်။ ဆော့ဖ်၀ဲ ကုမ္ပဏီတွေကိုတော့ ထုတ်ဖော်ပြောဆိုခြင်း မရှိပါဘူး။

စစ်ကောင်စီရဲ့ အခုအစီအစဥ်သစ်ဟာ တက်ကြွလှုပ်ရှားသူတွေ၊ အာဏာသိမ်းမှု ဆန့်ကျင်တဲ့သူတွေကို ပစ်မှတ်ထား စောင့်ကြည့်ဖိနှိပ်မယ့် အန္တရာယ်ရှိတယ်လို့ လေ့လာသူတွေက ပြောပါတယ်။

Ref: Reuters