နျူစွမ်းအင်ထုတ်လုပ်ရေး စစ်ခေါင်းဆောင်က ရုရှားနှင့် သဘောတူညီချက်ယူခဲ့

ဇူလိုင် ၁၄၊ ၂၀၂၂
M-Media

-မြန်မာအာဏာသိမ်းစစ်ကောင်စီနဲ့ ရုရှားတို့ဟာ နျူစွမ်းအင် ပူးပေါင်းဆောင်ရွက်ဖို့အတွက် သဘောတူညီခဲ့ကြပါတယ်။

မော်စကိုကိုရောက်နေတဲ့ စစ်ခေါင်းဆောင် ဗိုလ်ချုပ်မှူးကြီးမင်းအောင်လှိုင်ဟာ ရုရှားအစိုးရရဲ့ နျူစွမ်းအင်အဖွဲ့ Rosatom အကြီးအကဲ အလက်ဇီ လစ်ဟာရှက်ဗ်နဲ့ တနင်္လာနေ့က တွေ့ဆုံစဥ်မှာ နားလည်မှုစာချွန်လွှာကို လက်မှတ်ရေးထိုးခဲ့တာပါ။

နျူကလီးယားစွမ်းအင်ကို ငြိမ်းချမ်းစွာအသုံးပြုကာ နည်းပညာသုတေသန၊ ဆေး၀ါးထုတ်လုပ်ရေး၊ စိုက်ပျိုးရေး၊ မွေးမြူရေး၊ စားသောက်ကုန်ထုတ်လုပ်ရေး၊ စက်မှုလက်မှုကဏ္ဍတိုးတက်အောင် ဆောင်ရွက်ဖို့ ဆွေးနွေးခဲ့ကြတယ်လို့လည်း ရုရှားစွမ်းအင်၀န်ကြီးဌာနရဲ့ ထုတ်ပြန်ချက်မှာ ဖော်ပြထားပါတယ်။

မြန်မာစစ်ခေါင်းဆောင်ဟာ ရုရှား အာကာသဆိုင်ရာအဖွဲ့ Roscosmos အကြီးအကဲနဲ့ တွေ့ဆုံခဲ့ပြီး သိပ္ပံနဲ့ နည်းပညာ၊ လူသားအရင်းအမြစ် ဖွံ့ဖြိုးတိုးတက်ရေးကဏ္ဍတွေ ဆွေးနွေးခဲ့ကြတယ်လို့လည်း ဆိုပါတယ်။

Ref: The Star