သီရိလင်္ကာတွင် ထွက်ပြေးသွားသည့် သမ္မတကို သစ္စာခံသူက အာဏာယူရန် နီးစပ်နေ

ဇူလိုင် ၁၈၊ ၂၀၂၂
M-Media

-သမ္မတထွက်ပြေးသွားတဲ့ သီရိလင်္ကာမှာ အရင်အစိုးရကို သစ္စာခံတဲ့ ၀န်ကြီးချုပ်ဟောင်းက သမ္မတသစ်ဖြစ်လာဖို့ ရှိနေပါတယ်။

၀န်ကြီးချုပ် ရာနီလ် ၀စ်ကရီမီဆင်ဟီဟာ လက်ရှိမှာ ယာယီသမ္မတအဖြစ် တာ၀န်ထမ်းဆောင်နေပြီး အမြဲတမ်းသမ္မတ ရွေးကောက်မှုမှာလည်း သူပဲ အာဏာပြန်ရဖို့ ရှိနေပါတယ်။

ရာနီလ်ကို ထွက်ပြေးသွားတဲ့ သမ္မတ ဂိုတာဘာယာ ရာဂျာပက်ဆာက အခုနှစ်မေလမှာ ၀န်ကြီးချုပ် ခန့်ခဲ့တာဖြစ်ပါတယ်။

သီရိလင်္ကာလွှတ်တော်ဟာ နောက်ထပ် ၅ နှစ်အတွက် သမ္မတရွေးကောက်မှု လုပ်ငန်းစဥ်ကို လာမယ့် စနေနေ့မှာ စတင်ဆောင်ရွက်မှာပါ။

သောကြာနေ့မှာ ယာယီသမ္မတအဖြစ် ကျမ်းကျိန်ခဲ့တဲ့ ရာနီလ်ဟာ စနေနေ့မှာတော့ နိုင်ငံကို အရေးပေါ်အခြေအနေ ကြေငြာခဲ့ပါတယ်။

သီရိလင်္ကာမှာ ဧပြီလကတည်းကစတင်ကာ အရေးပေါ်အခြေအနေ ကြေငြာခဲ့ပြီး အစိုးရကိုဆန့်ကျင်တဲ့ ပြည်သူလူထုရဲ့ ဆန္ဒပြမှုကို ဖြိုခွင်းဖို့ ရည်ရွယ်ထုတ်ပြန်တာ ဖြစ်ပါတယ်။

ပြည်သူ့လုံခြုံရေး၊ တရားဥပဒေစိုးမိုးရေးနဲ့ အသက်ရှင်ရပ်တည်ဖို့ လိုအပ်တဲ့ အထောက်အပံ့တွေပေးဖို့ အရေးပေါ်အခြေအနေ ထုတ်ပြန်တာလို့ ရာနီလ်က ပြောပေမယ့် နိုင်ငံရေးကျွမ်းကျင်သူတွေက ရာနီလ်ဟာ အရင်အစိုးရလိုပဲ ပြည်သူကို ဖိနှိပ်တာမျိုး ဖြစ်လာနိုင်တယ်လို့ သုံးသပ်ပါတယ်။

သမ္မတ ဂိုတာဘာယာ ထွက်ပြေးသွားပြီးနောက် သီရိလင်္ကာနိုင်ငံအတွင်း ဆန္ဒပြမှုတွေ ဆက်ရှိနေပါတယ်။ ဂိုတာဘာယာဟာ မော်လ်ဒိုက်ကနေတစ်ဆင့် စင်ကာပူကို ရောက်ရှိနေပါတယ်။

Ref: Reuters