စစ်ကောင်စီက ရုရှားတိုက်လေယာဥ်များဖြင့် ပြည်သူကို တိုက်ခိုက်နေ

ဇူလိုင် ၃၀၊ ၂၀၂၂
M-Media

-အာဏာသိမ်းစစ်ကောင်စီက အရပ်သားတွေကို ပစ်မှတ်ထားပြီး တိုက်ခိုက်ရာမှာ ရုရှားလုပ် တိုက်လေယာဥ်တွေကို အသုံးပြုနေတယ်လို့ လူ့အခွင့်အရေး စောင့်ကြည့်အဖွဲ့တစ်ခုဖြစ်တဲ့ Myanmar Witness က ထုတ်ပြန်ပါတယ်။

Myanmar Witness ဟာ လန်ဒန်အခြေစိုက်အဖွဲ့ တစ်ခုဖြစ်ပြီး မြန်မာနိုင်ငံမှာ လက်ရှိဖြစ်ပွားနေတဲ့ မတည်ငြိမ်မှုတွေကို အချက်အလက်ကောက်ယူ စစ်တမ်းပြုစုနေတာ ဖြစ်ပါတယ်။

မနေ့က ထုတ်ပြန်တဲ့ အစီရင်ခံစာမှာ စစ်ကောင်စီတပ်တွေက အရပ်သားတွေနေထိုင်တဲ့ ဒေသတစ်၀ိုက်မှာ ရုရှားလုပ် Yak-130 တိုက်လေယာဥ်တွေကို အသုံးပြုကာ ဒုံးကျည်နဲ့ ပစ်တာ၊ ၂၃ မမ အမြောက်တွေနဲ့ ပစ်တဲ့ သက်သေအထောက်အထားတွေ တွေ့ရတယ်လို့ ဖော်ပြထားပါတယ်။

တိုင်းရင်းသား လက်နက်ကိုင်တွေနဲ့ တော်လှန်ရေးတပ်ဖွဲ့တွေကို မြန်မာစစ်တပ်က တိုက်ခိုက်တဲ့ ဓာတ်ပုံ၊ ဗီဒီယိုပုံရိပ်တွေကို သုံးသပ်ပြီး Myanmar Witness က အတည်ပြုခဲ့တာ ဖြစ်ပါတယ်။

ဇွန်လအတွင်း ထိုင်းနယ်စပ် မြ၀တီမြို့မှာ တိုင်းရင်းသားလက်နက်ကိုင်တွေကို လေကြောင်းက တိုက်ခိုက်တဲ့ ဗီဒီယိုနှစ်ခု၊ သေဘော့ဘိုးက တိုက်ခိုက်မှု ဗီဒီယိုတွေမှာ စစ်ကောင်စီတပ်တွေဟာ Yak-130 အပါအ၀င် လေယာဥ်မျိုးစုံ အသုံးပြုခဲ့တာကို တွေ့ရပါတယ်။

Myanmar Witness က စစ်ကောင်စီတပ်မှာ အနည်းဆုံး Yak-130 လေယာဥ် အစီး ၂၀ လောက် ရှိမယ်လို့ ခန့်မှန်းပါတယ်။

ရုရှားဟာ မြန်မာစစ်တပ်ရဲ့ ၂၀၂၁ ခုနှစ် ဖေဖော်၀ါရီ ၁ ရက်နေ့ အာဏာသိမ်းမှုကို အပြည့်၀ထောက်ခံပြီး စစ်ရေးပူးပေါင်းဆောင်ရွက်မှု တိုးမြှင့်သွားမယ်လို့လည်း တရား၀င် ထုတ်ပြန်ထားပါတယ်။

Ref: DW