မြန်မာစစ်ခေါင်းဆောင်များကို ကိုင်တွယ်နိုင်ရေး အာဆီယံက ဗျူဟာပြောင်းမည်

သြဂုတ် ၄၊ ၂၀၂၂
M-Media

-မြန်မာအာဏာသိမ်းစစ်ကောင်စီက ဖမ်းဆီးထားသူတွေကို ဆက်လက် သတ်ဖြတ်နေအုံးမယ်ဆိုရင် သဘောတူညီချက် ၅ ချက် ဗျူဟာကို ပြောင်းရလိမ့်မယ်လို့ အာဆီယံ ဥက္ကဌ ကမ္ဘောဒီးယား၀န်ကြီးချုပ် ဟွန်ဆန်က ပြောပါတယ်။

ဖနွမ်းပင်မြို့မှာ လုပ်နေတဲ့ အာဆီယံနိုင်ငံခြားရေး၀န်ကြီးများ အစည်းအ၀ေးမှာ ဟွန်ဆန်က ဒီလို ပြောကြားလိုက်တာပါ။ ဒီအစည်းအ၀ေးကို စစ်ကောင်စီ နိုင်ငံခြားရေး၀န်ကြီး တက်ရောက်ခွင့် မရပါဘူး။

အာဏာသိမ်းပြီးနောက် ဖြစ်ပေါ်လာတဲ့ မတည်ငြိမ်မှုတွေကို ဖြေရှင်းရေး ၂၀၂၁ ခုနှစ် ဧပြီလမှာ အာဆီယံက မူ ၅ ချက် ချမှတ်ခဲ့ပြီး မြန်မာစစ်ခေါင်းဆောင်က သဘောတူခဲ့ပေမယ့် အခုအချိန်အထိ အကောင်အထည်ဖော်မှု မရှိပါဘူး။

အဖွဲ့၀င်နိုင်ငံတွေ ဖြစ်ချင်တဲ့အတိုင်း သဘောတူညီချက် ၅ ရပ် အကောင်အထည်မပေါ်လာပေမယ့် လူသားချင်းစာနာထောက်ထားမှုဆိုင်ရာ အကူအညီတွေ ပေးတဲ့နေရာမှာတော့ တိုးတက်မှုတွေ ရှိတယ်လို့ ဟွန်ဆန်က ပြောပါတယ်။

ဒါပေမယ့် ဖမ်းထားတဲ့အကျဥ်းသားတွေကို စစ်ကောင်စီက ကွပ်မျက်လိုက်တဲ့အတွက် အခြေအနေက သိသိသာသာ ပြောင်းလဲသွားပြီး ငြိမ်းချမ်းရေး မဆောင်ရွက်နိုင်ခင် ပိုဆိုးဖို့ ရှိနေတယ်လို့ ဟွန်ဆန်က ထည့်သွင်း သတိပေးခဲ့ပါတယ်။

“အကျဥ်းသားတွေကို ဆက်သတ်နေအုံးမယ်ဆိုရင် ကျွန်တော်တို့ရဲ့ အခန်းကဏ္ဍနဲ့ သဘောတူညီချက် ၅ ရပ်ကို ပြန်စဥ်းစားရတော့မှာပါ”

အာဆီယံအဖွဲ့မှာ မလေးရှား၊ စင်ကာပူ၊ အင်ဒိုနီးရှားတို့ အပါအ၀င် တစ်ချို့နိုင်ငံတွေက စစ်ကောင်စီကို ထိထိရောက်ရောက် ကိုင်တွယ်ဖို့ လိုလားနေကြတာ ဖြစ်ပါတယ်။

Ref: Reuters