ပါကစ္စတန်မှာ ရုပ်လုံးပေါ်လာပြီဖြစ်တဲ့ သစ်တောသစ်များ ဖန်တီးမှု စီမံကိန်း

သြဂုတ် ၁၇၊ ၂၀၂၂

M-Media

-ပါကစ္စတန်မှာ ၂၀၁၉ ခုနှစ်က စတင်ခဲ့တဲ့ နိုင်ငံတစ်၀ှမ်း သစ်ပင်တွေစိုက်ပျိုးကာ သစ်တောသစ်တွေ ဖန်တီးရေး စီမံကိန်းဟာ လက်ရှိမှာ ရုပ်လုံးပေါ်စ ပြုနေပြီ ဖြစ်ပါတယ်။

၀န်ကြီးချုပ် အင်မရန်းခန်း ဦးဆောင်တဲ့ ပါကစ္စတန် အစိုးရဟောင်းဟာ စီမံကိန်းသက်တမ်းကို ၂၀၂၃ ခုနှစ်အထိ သတ်မှတ်ခဲ့ပြီး သစ်ပင်ပေါင်း ၁၀ ဘီလီယံလောက် စိုက်ပျိုးဖို့ စီစဥ်ခဲ့တာ ဖြစ်ပါတယ်။

မြို့တော် ကရာချီရဲ့ ကလစ်ဖ်တန်ခရိုင်က အမှိုက်ပုံပြီးဟာ လက်ရှိမှာတော့ သစ်တောအငယ်စားလေး ဖြစ်ကာ ပြည်သူတွေ အပန်းဖြေအနားယူရာနေရာတစ်ခု ဖြစ်လာပါပြီ။

“အခုဆို ဒီနေရာက ပိုမိုစိမ်းလန်းပြီး ပျော်စရာနေရာ ဖြစ်လာပါတယ်။ ညနေဆို ကလေးတွေက ဒီမှာလာကစားကြတယ်။ လူကြီးတွေက လမ်းလျှောက်ကြတာပေါ့။ ပြီးခဲ့တဲ့ လေးနှစ်လုံးလုံး ဒီအပင်လေးတွေကို ရင်၀ယ်သားသဖွယ် ကျွန်တော် ပြုစုပျိုးထောင်လာခဲ့တာပါ” လို့ အသက် ၆၁ နှစ်အရွယ် ဥယျာဥ်မှုး မူလာဇင် ဟူစိန်က ပြောပါတယ်။

ဟူစိန်ဟာ ကလစ်ဖ်တန်က အစိုးရပိုင် ပန်းခြံကို သစ်တောအငယ်စားလေးဖြစ်အောင် ဦးစီး ဖန်တီးပေးရသူ ဖြစ်ပါတယ်။

ပါကစ္စတန်မှာ လူဦးရေ စုစုပေါင်း သန်း ၂၂၀ ကျော်ရှိပြီး သစ်တောအရေအတွက်က နိုင်ငံအကျယ်အ၀န်းရဲ့ ၅.၄ ရာခိုင်နှုန်းသာ ရှိပါတယ်။ ဒါဟာ အိမ်နီးချင်းနိုင်ငံတွေဖြစ်တဲ့ အိန္ဒိယ (၂၄ ရာခိုင်နှုန်း)၊ ဘင်္ဂလားဒေ့ရှ် (၁၄.၅ ရာခိုင်နှုန်း) ထက် အများကြီး နည်းနေတာ ဖြစ်ပါတယ်။ ကမ္ဘာကြီး ပူနွေးမှုဒဏ်ကို အဆိုးရွားဆုံး ခံနေရတဲ့ ထိပ်ဆုံး ၁၀ နိုင်ငံမှာလည်း ပါကစ္စတန် ပါ၀င်နေပါတယ်။

ပင်လယ်တွေပြီးရင် သစ်ပင်တွေဟာ ကာဘွန်ဒိုင်အောက်ဆိုက်ကို အဓိကစုပ်ယူပေးတဲ့ ရင်းမြစ်တွေ ဖြစ်ပါတယ်။ ကာဘွန်ဒိုင်အောက်ဆိုက် လေထုထဲမှာ အလွန်အမင်း များပြားလာမှုကြောင့် ကမ္ဘာကြီးပူနွေးမှု မြင့်တက်လာပြီး အပူချိန်မြင့်တာ၊ မိုးခေါင်ရေရှားတာ၊ ရေကြီးရေလျှံတာလို နောက်ဆက်တွဲဆိုးကျိုးတွေကို လူသားတွေ ခါးစီးခံလာရပါတယ်။

ပါကစ္စတန်ဟာ ၂၀၁၅ ခုနှစ်မှာ ရာသီဥတု ဆိုးရွားမှုဒဏ်ကို အကြီးအကျယ် ခံစားခဲ့ရပါတယ်။ အပူလှိုင်းဖြတ်မှုကြောင့် ကရာချီတစ်မြို့ထဲမှာတင် ၃ ရက်အတွင်း လူ ၄၀၀ ကျော် သေဆုံးခဲ့ပါတယ်။

ပါကစ္စတန်အစိုးရရဲ့ ဒီသစ်ပင်စိုက် စီမံကိန်းကို ၀ေဖန်မှုတစ်ချို့လည်း ရှိပါတယ်။ အထူးသဖြင့် သိပ်ပြီး ဂရုစိုက်စရာမလိုတဲ့ သစ်ပင်တွေထက် နေ့စဥ် ရေလောင်းပေါင်းသင်ပေးရတဲ့ သစ်ပင်တွေကို စိုက်ပျိုးကြတဲ့ ကိစ္စပါ။ ပါကစ္စတန်က တစ်ချို့နေရာတွေဟာ ရေအလွန်ရှားတဲ့ ဒေသတွေ ဖြစ်ပါတယ်။

နိုင်ငံတစ်၀ှမ်း သစ်ပင် စိုက်ပျိုးရေး စီမံကိန်းကို ဦးဆောင်နေတဲ့ ရှဇက် ကိုရိုက်ရှီက သစ်ပစ်တွေဟာ အပူချိန်ကို လျှော့ချနိုင်သလို၊ ရေကြီးရေလျှံတာကို လျော့ချပေးကာ၊ စားနပ်ရိက္ခာအတွက်လည်း တစ်စိတ်တစ်ပိုင်း အထောက်အကူဖြစ်စေတယ်လို့ ပြောပါတယ်။

Ref: Aljazeera