ထောင်ကျနေသည့် မလေး၀န်ကြီးချုပ်ဟောင်း ဘုရင့် လွတ်ငြိမ်းချမ်းသာခွင့်ဖြင့် ပြန်လွတ်လာဖွယ်ရှိ

သြဂုတ် ၂၇၊ ၂၀၂၂
M-Media

-တရားရုံးချုပ်က အယူခံပယ်ချပြီးတဲ့နောက်ပိုင်း ထောင်ဒဏ် စတင်ကျခံနေရတဲ့ မလေးရှား၀န်ကြီးချုပ်ဟောင်း နာဂျစ်ရာဇတ်ဟာ ဘုရင့် လွတ်ငြိမ်းချမ်းသာခွင့်နဲ့ ပြန်လွတ်လာဖွယ်ရှိတယ်လို့ မဟာသီယာ မိုဟာမက်က ပြောကြားလိုက်ပါတယ်။

မဟာသီဟာ မလေးရှားရဲ့ အထင်ကရ သက်တော်ရှည်၀န်ကြီးချုပ်ဟောင်းဖြစ်ပြီး ၂၀၁၈ ခုနှစ် ရွေးကောက်ပွဲမှာ နာဂျစ်နဲ့ သူ့ရဲ့ပါတီကို အံ့အားသင့်ဖွယ် ဖြုတ်ချနိုင်ခဲ့တာပါ။

အဲ့ဒီနောက်ပိုင်း မဟာသီအစိုးရဟာ နာဂျစ်အစိုးရရဲ့ ခြစားမှုတွေ၊ ပြည်သူ့ဘဏ္ဍာ အလွဲသုံးစားလုပ်မှုတွေကို ဖော်ထုတ်ပြီး တရားစွဲဆိုခဲ့ပါတယ်။ အဲဒီကိစ္စနဲ့ပဲ နာဂျစ်ဟာ ထောင်ဒဏ် ၁၂ နှစ် ချမှတ်ခံခဲ့ရပါတယ်။

လက်ရှိ နာဂျစ်တစ်ယောက် ထောင်ထဲမှာ ရှိနေပမယ့် ပြန်လွတ်လာနိုင်တယ်လို့ ဒီကနေ့ ထုတ်ပြန်ချက်မှာ မဟာသီက ပြောပါတယ်။

“ထောင်ကျနေရပေမယ့် ဘုရင်ရဲ့ လွတ်ငြိမ်းချမ်းသာခွင့်နဲ့ နာဂျစ် ပြန်ထွက်လာဖို့ ရှိပါတယ်”

နာဂျစ်ဟာ ထောင်ဒဏ်အပြင် မလေးရှားရင်းဂစ် သန်း ၂၁၀ လည်း ဒဏ်ငွေ ပေးဆောင်ရမှာ ဖြစ်ပါတယ်။

မလေးရှားဟာ လာမယ့်နှစ်မှာ အထွေထွေရွေးကောက်ပွဲ ပြုလုပ်ဖို့ရှိပြီး နာဂျစ်ရဲ့ ပါတီ UMNO က ပြန်အနိုင်ရဖို့ အလားအလာ များနေပါတယ်။ အစိုးရထောက်ခံချက်နဲ့ ဘုရင်က လွတ်ငြိမ်းချမ်းသာခွင့်ပေးရင် နာဂျစ်ဟာ ပြန်လည် လွတ်မြောက်လာဖို့ ရှိနေပါတယ်၊

လက်ရှိမှာတော့ ပြည်သူလူထုဟာ နာဂျစ်ကို လွတ်ငြိမ်းချမ်းသာခွင့်မပေးရေး ဘုရင်ထံ လက်မှတ်ရေးထိုး တောင်းဆိုတဲ့ ကမ်ပိန်းတစ်ခုကို လုပ်ဆောင်နေပါတယ်။

Ref: CNA