အာဖဂန်တွင် လူ ၆ သန်း အငတ်ဘေးဆိုက်မည့် အန္တရာယ် ရှိနေ

သြဂုတ် ၃၀၊ ၂၀၂၂
M-Media

-အကြပ်အတည်းပေါင်းစုံ ဖြစ်ပေါ်နေတဲ့ အာဖဂန်နစ္စတန်မှာ လူ ၆ သန်းလောက် အငတ်ဘေးဆိုက်မယ့်အန္တရာယ်ရှိနေတယ်လို့ ကုလ လူသားချင်း စာနာထောက်ထားမှုဆိုင်ရာ အကြီးအကဲ မာတင် ဂရီဖစ်က သတိပေးလိုက်ပါတယ်။

ပြီးခဲ့တဲ့နှစ် သြဂုတ်လ တာလီဘန်တွေ ပြန်သိမ်းပြီးနောက်ပိုင်း အာဖဂန်မှာ စီးပွားပျက်မှု၊ ဘဏ္ဍာရေးပြဿနာစတာတွေ ပိုဆိုးလာခဲ့ပြီး ရာသီဥတု ဖောက်ပြန်မှု၊ လူသားချင်း စာနာထောက်ထားမှုဆိုင်ရာ အခက်အခဲတွေက အခြေအနေကို ပိုမိုဆိုးရွားစေပါတယ်။

ဒီပြဿနာတွေကို ကျော်လွှားနိုင်ရေး လာမယ့်လတွေအတွင်း အာဖဂန်ပြည်သူတွေဟာ ကန်ဒေါ်လာ သန်း ၇၇၀ လောက် လိုအပ်နေတယ်လို့ မနေ့က လုံခြုံရေးကောင်စီ အစည်းအ၀ေးမှာ ဂရီဖစ်က ပြောကြားခဲ့ပါတယ်။

တာလီဘန်တက်လာပြီးနောက်ပိုင်း နိုင်ငံတကာအသိုင်းအ၀ိုင်းက အကူအညီတွေ ရပ်ဆိုင်းလိုက်မှုကိုလည်း သူက ၀ေဖန်ခဲ့ပါတယ်။

“ဆင်းရဲတွင်း ပိုနက်လာတယ်။ လူဦးရေးက ကြီးထွားနေတယ်။ အုပ်ချုပ်သူ အာဏာရှင်တွေမှာလည်း အနာဂတ်အတွက် ရင်းနှီးဖို့ ဘက်ဂျက်မရှိဘူး။ ဖွံ့ဖြိုးရေးအကူအညီတွေ လိုအပ်နေတယ်ဆိုတာ သိပ်ကို ထင်ရှားပါတယ်”

အာဂန်ပြည်သူ ၃၉ သန်းမှာ ထက်၀က်ကျော်က လူသားချင်း စာနာထောက်ထားမှုဆိုင်ရာ အကူအညီတွေ လိုအပ်နေပြီး၊ ၆ သန်းလောက်က အငတ်ဘေးဆိုက်မယ့် အန္တရာယ် ကြုံတွေ့နေရပါတယ်။

ကလေးငယ်တစ်သန်းကျော်ဟာ အသက်သေဆုံးနိုင်တဲ့ အာဟာရချို့တဲ့မှုမျိုး ခံစားနေရပြီး သေသေချာချာ ကုသမှုမပေးနိုင်ရင် အသက်ဆုံးရှုံးမယ့်အန္တရာယ်မျိုး ရှိနိုင်တယ်လို့လည်း ဂရီဖစ်က ထည့်သွင်းပြောဆိုခဲ့ပါတယ်။

နိုင်ငံတကာက အကူအညီပေးရာမှာ တာလီဘန်တွေက ပူးပေါင်းဖို့ လိုအပ်နေပြီး လက်ရှိ တာလီဘန်ရဲ့ အဟန့်အတားတွေက အကူအညီတွေကို နှောင့်နှေးစေတယ်လို့ ကုလ လူသားချင်း စနာထောက်ထားမှုဆိုင်ရာ အကြီးအကဲက ထောက်ပြပြောဆိုခဲ့ပါတယ်။

Ref: Aljazeera