ဘုန်းကြီး၊ သီလရှင်ယောင်ဆောင်ထားသည့် စစ်ကောင်စီသူလျှိုများကို ထိုင်း ဖမ်းဆီး

သြဂုတ် ၃၁၊ ၂၀၂၂
M-Media

-မြန်မာနိုင်ငံက လာဖွင့်ထားတဲ့ သဘာ၀ဓမ္မ တရားရိပ်သာကို ၀င်ရောက်စီးနင်း ဖမ်းဆီးမှုအတွင်း ဘုန်းကြီးနဲ့ သီလရှင်ပုံစံ ဟန်ဆောင်ထားတဲ့ စစ်ကောင်စီ သူလျှိုတွေကို တွေ့ရတယ်လို့ ထိုင်းအာဏာပိုင်တွေကို ကိုးကားပြီး ထိုင်းမီဒီယာတွေက ဖော်ပြပါတယ်။

ထိုင်း-မြန်မာနယ်စပ် မဲဆောက်နဲ့ သိပ်မ၀ေးတဲ့ မယ်ပမှာ တနင်္လာနေ့က စီးနင်းမှုအတွင်း အထောက်အထားမဲ့ မြန်မာနိုင်ငံသား ၃၈ ဦးကို ဖမ်းဆီးခဲ့ပြီး အဲဒီအထဲမှာ သီလရှင်တွေနဲ့ ဘုန်းကြီးတွေလည်း ပါ၀င်နေတာပါ။

မဲဆောက်မှာ ရှိနေတဲ့ စစ်အာဏာသိမ်းမှု ဆန့်ကျင်ရေးအဖွဲ့တွေအကြောင်း စုံစမ်း ထောက်လှမ်းဖို့အတွက် စစ်ကောင်စီက လွှတ်လိုက်တာလို့ စစ်ဆေးမေးမြန်းမှုမှာ သူတို့က ဖြေကြားခဲ့ပါတယ်။

အဲဒီ ဘုန်းကြီးနဲ့ သီလရှင်တွေဟာ ဘန်ကောက်မြို့အထိ သွားရောက်ပြီး စုံစမ်းထောက်လှမ်းမှုတွေ ပြုလုပ်ခဲ့တယ်လို့ ထွက်ဆိုခဲ့ပါတယ်။

သဘာ၀ဓမ္မ တရားရိပ်သာဟာ ရန်ကုန်တိုင်းဒေသကြီး သန်လျင်အခြေစိုက် ဗုဒ္ဓဘာသာ အဖွဲ့အစည်းတစ်ခုဖြစ်ပြီး ပြီးခဲ့တဲ့နှစ် ဧပြီလက မဲဆောက်မှာ ရိပ်သာခွဲ ဖွင့်လှစ်ခဲ့တာဖြစ်ပါတယ်။

ရိပ်သာကို ဦးဆောင်နေတဲ့ ဘုန်းကြီးတွေဟာ စစ်ခေါင်းဆောင်တွေရဲ့ သြဇာခံဖြစ်တယ်လို့ နာမည်ကြီးပြီး၊ စစ်အာဏာရှင်စနစ်ဟာ ဗုဒ္ဓဘာသာ အတွက် ပိုပြီးစိတ်ချရတယ်ဆိုတဲ့ ဦးဆောင်ဆရာတော်တစ်ပါးရဲ့ အင်တာဗျူးဟာ အာဏာသိမ်းပြီး သိပ်မကြာခင် အွန်လိုင်းမှာ ပြန့်နှံ့ခဲ့ပါတယ်။

Ref: Bangkok Post