ကမ္ဘာ့သင်္ဘောတည်ဆောက်ရေးလုပ်ငန်းမှာ နောက်တစ်ဆင့် တက်လာနိုင်တဲ့ ဘင်္ဂလားဒေ့ရှ်

စက်တင်ဘာ ၂၃၊ ၂၀၂၂
M-Media

-ဘင်္လားဒေ့ရှ်နိုင်ငံဟာ ပြည်တွင်းဖြစ် အဆင့်မြင့် ကုန်တင်သင်္ဘောကို ယူကေနိုင်ငံဆီ ပထမဆုံးအကြိမ် တင်ပို့ရောင်းချခဲ့ပြီး ပင်လယ်ကူးသင်္ဘောတွေ တင်ပို့ရေးလုပ်ငန်းကို နောက်တစ်ဆင့် ချဲ့ထွင်လာနိုင်ပါတယ်။

၃၆၄ ပေအရှည်၊ ၅၄ ပေအကျယ်ရှိပြီး ကုန်တန်ချိန်ပေါင်း ၆၁၀၀ တင်ဆောင်နိုင်တဲ့ အဲဒီသင်္ဘောဟာ ဘင်္လားဒေ့ရှ် ပြည်တွင်းမှာ ထုတ်လုပ်ဖူးတဲ့ အကြီးဆုံး သင်္ဘောပါ။

မြင်းကောင်ရေ ၄၁၃၀ ရှိတဲ့ အင်ဂျင်တပ်ထားပြီး တစ်နာရီကို ရေမိုင် ၁၂ မိုင်ခွဲအထိ ခုတ်မောင်းနိုင်ပါတယ်။ ယူကေဆီ သင်္ဘောလွှဲပြောင်း ပေးအပ်ပွဲ အခမ်းအနားကို အခုတစ်ပတ်အစောပိုင်းမှာ ကျင်းပပြုလုပ်ခဲ့ပါတယ်။

“၂၀၀၈ ခုနှစ်မှာ ဒိန်းမတ်နိုင်ငံကို သင်္ဘော ပထမဆုံးတင်ပို့တယ်။ အခု ယူကေကို တင်ပို့ရောင်းချနိုင်တာပေါ့။ ယူကေက ဘင်္လားဒေ့ရှ်ဆီကနေ သင်္ဘော၀ယ်တာ ဒါပထမဆုံးပါ” လို့ သင်္ဘောတည်ဆောက်တဲ့ ဘင်္ဂလားဒေ့ရှ်ကုမ္ပဏီ Ananda Group ရဲ့ အမှုဆောင်ဒါရိုက်တာ တာရစ်ကူ အစ္စလာမ်က ပြောပါတယ်။

ဒီသင်္ဘောကို ဘက်စုံ အသုံးပြုနိုင်ပြီး၊ ကုန်တင်မယ်ဆိုရင်လည်း နျူကလီးယား စွန့်ပစ်ပစ္စည်းကလွဲရင် ကျန်တဲ့ပစ္စည်းအားလုံးကို တင်ဆောင်နိုင်ပါတယ်။

“ရေခဲမြစ်ထဲမှာလည်း သင်္ဘောကို မောင်းလို့ရတယ်။ ၄ ပေအထူလောက်ရှိတဲ့ ရေခဲအလွှာကို အသာလေးခွဲပြီး သွားနိုင်ပါတယ်။ ကပ္ပတိန်ရဲ့ ညွှန်ကြားချက်မလိုဘဲ အလိုအလျောက် မောင်းနှင်စနစ်နဲ့ ၁၆ နာရီအထိ မောင်းနိုင်ပါတယ်” လို့ တာရစ်ကူက ထည့်သွင်းပြောဆိုခဲ့ပါတယ်။

ဘင်္လားဒေ့ရှ်ဟာ စက်မှုခေတ်သစ်ရဲ့ အစောပိုင်းကာလကတည်းက သင်္ဘောတည်ဆောက်ရေးလုပ်ငန်း အခြေတည်တဲ့ နိုင်ငံတစ်ခုဖြစ်ပါတယ်။ လက်ရှိအချိန်မှာ ဒီလုပ်ငန်းဟာ ပိုမိုကြီးထွားဖြစ်ထွန်းလာပြီး ကမ္ဘာတစ်၀ှမ်း တင်ပို့ရောင်းချနိုင်တဲ့ အနေအထားအထိ ဖြစ်လာပါတယ်။

ဘင်္ဂလားဒေ့ရှ်မှာ သင်္ဘောတည်ဆောက်ရေး ကုမ္ပဏီပေါင်း ၂၀၀ ကျော် ရှိနေပြီး ဒီလုပ်ငန်းကနေ ရရှိတဲ့ နိုင်ငံ့၀င်ငွေဟာ တစ်နှစ်ကို တာကာ ဘီလီယံ ၁၅၀ လောက် ရှိနေပါတယ်။

Ref: TBS News