၀ီဂါများအား ဖိနှိပ်မှုတွင် ပါ၀င်သည့် နာမည်ကျော် တရုတ်ဒရုန်းကုမ္ပဏီကို အမေရိကန်က အမည်ပျက်စာရင်းသွင်း

အောက်တိုဘာ ၇၊ ၂၀၂၂
M-Media

-တရုတ်စစ်တပ်က တိုင်းရင်းသား လူနည်းစုတွေအပေါ် ဖိနှိပ်ညှင်းပမ်းမှုမှာ ပူးပေါင်းပါ၀င်မှုအတွက် နာမည်ကျော် တရုတ်ဒရုန်းကုမ္ပဏီ DJI Technology ကို အမေရိကန် ကာကွယ်ရေး၀န်ကြီးဌာနက အမည်ပျက်စာရင်း သွင်းလိုက်ပါတယ်။

DJI ဟာ ကမ္ဘာတစ်၀ှမ်း လုံးငန်းသုံး ဒရုန်းစျေးကွက်ရဲ့ ထက်၀က်ကျော်ကျော်လောက်ကို လွှမ်းမိုးထားနိုင်တဲ့ ကုမ္ပဏီပါ။

ဗုဒ္ဓဟူးနေ့ အမေရိကန် ကာကွယ်ရေး၀န်ကြီးဌာနက ထုတ်ပြန်တဲ့ ကြေငြာချက်မှာ DJI အပါအ၀င် နည်းပညာနဲ့ စက်မှုလုပ်ငန်း စုစုပေါင်း ၁၃ ခုကို အမည်ပျက်စာရင်းထဲ ထည့်သွင်းကြောင်း ဖော်ပြထားပါတယ်။

၀ီဂါနဲ့ အခြား လူမျိုးစုငယ်တွေအပေါ် လူ့အခွင့်အရေးချိုးဖောက်မှုတွေ ကျူးလွန်နေတဲ့ တရုတ်စစ်တပ်နဲ့ အဆက်အသွယ်ရှိတဲ့အတွက်လို့ ဆိုပါတယ်။

ကန်ကာကွယ်ရေး၀န်ကြီးဌာနရဲ့ အမည်ပျက်စာရင်းမှာ ပါ၀င်တဲ့ တရုတ်လုပ်ငန်းပေါင်း ၆၀ ကျော် ရှိနေပြီး နာမည်ကြီး ဟွာ၀ေးကုမ္ပဏီလည်း ပါ၀င်ပါတယ်။

DJI နဲ့ ဆက်နွယ်နေတဲ့ လူပုဂ္ဂိုလ်တွေကို ပြီးခဲ့တဲ့နှစ်မှာ အမေရိကန် ဘဏ္ဍာရေး၀န်ကြီးဌာနက ပိတ်ဆို့မှုတွေ ပြုလုပ်ခဲ့ပါတယ်။

ကာကွယ်ရေး၀န်ကြီးဌာနက အခုလို အမည်ပျက်စာရင်းထဲ ထည့်သွင်းခဲ့တာကြောင့် အမေရိကန်သမ္မတဟာ ဒီလုပ်ငန်းတွေအပေါ် ပိတ်ဆို့အရေးယူမှုတွေ လုပ်ဆောင်နိုင်မှာ ဖြစ်ပါတယ်။

Ref: Reuters