အိန္ဒိယနိုင်ငံသားများ မြန်မာနှင့် အရှေ့တောင်အာရှနိုင်ငံများသို့ လူကုန်ကူးခံရ

အောက်တိုဘာ ၈၊ ၂၀၂၂
M-Media

-မြန်မာ၊ လာအိုနဲ့ ကမ္ဘောဒီးယားနိုင်ငံတို့မှာ လူကုန်ကူးခံရတဲ့ နိုင်ငံသား ၁၃၀ လောက်ကို ကယ်ထုတ်ခဲ့တယ်လို့ အိန္ဒိယအစိုးရက ထုတ်ပြန်ပါတယ်။

ဒူဘိုင်း၊ ဘန်ကောက်နဲ့ အိန္ဒိယမြို့တစ်ချို့မှာ နည်းပညာဆိုင်ရာအလုပ်တွေ ရမယ်ဆိုတဲ့ အေးဂျင့်တွေရဲ့ လိမ်ညာလှည့်ဖျားမှုကို ခံခဲ့ရတာပါ။ တကယ်တမ်းက အွန်လိုင်းကနေ ငွေလိမ်တဲ့အလုပ်တွေမှာ လုပ်ရတာ ဖြစ်ပါတယ်။

အိန္ဒိယ နိုင်ငံခြားရေး၀န်ကြီးဌာန ပြောရေးဆိုခွင့်ရှိသူ အရင်ဒန် ဘဂ်ချီက အေးဂျင့်တွေ မြန်မာနိုင်ငံကို တရားမ၀င် ခေါ်ဆောင်သွားတဲ့လူ အများအပြားရှိနေပြီး ၅၀ နီးပါးကို ကယ်တင်နိုင်ခဲ့တယ်လို့ ပြောပါတယ်။

တရားမ၀င် ၀င်ရောက်မှုနဲ့ မြန်မာရဲတွေက ဖမ်းထားတာတွေလည်း ရှိသေးတယ်လို့ သူက ဆိုပါတယ်။ ကမ္ဘောဒီးယားနဲ့ လာအိုတို့က လူ ၈၀ လောက်ကိုလည်း အိန္ဒိယအစိုးရက ကယ်ထုတ်နိုင်ခဲ့ပါတယ်။

အိန္ဒိယနိုင်ငံတောင်ပိုင်း တမီလ်နာဒူးပြည်နယ် လွှတ်တော်အမတ် အမ်ကေ စတာလင်က တမီလ်လူမျိုး ၅၀ အပါအ၀င် အိန္ဒိယနိုင်ငံသား ၃၀၀ လောက် မြန်မာနိုင်ငံကို လူကုန်ကူးခံရပြီး ပိတ်မိနေတယ်လို့ ပြီးခဲ့တဲ့လမှာ ၀န်ကြီးချုပ် မိုဒီထံ စာပို့အကြောင်းကြားခဲ့ပါတယ်။

မြန်မာ၊ လာအိုနဲ့ ကမ္ဘောဒီးယားတို့က တရုတ်လောင်းကစားလုပ်ငန်းတွေ၊ အွန်လိုင်းငွေလိမ်တဲ့လုပ်ငန်းတွေကို လူကုန်ကူးခံရသူ အရေအတွက်ဟာ ပြီးခဲ့တဲ့နှစ်ကစပြီး မြင့်တက်လာခဲ့ပါတယ်။

လူကုန်ကူးခံရပြီးရင် အဲဒီလုပ်ငန်းတွေမှာ ကျွန်ပြုခံရပြီး မိသားစုတွေက ငွေကြေးအမြောက်အများနဲ့ ပြန်ရွေးရတာမျိုးတွေ ရှိနေပါတယ်။

လက်ရှိအချိန်အထိ တရုတ်၊ ထိုင်း၊ ဗီယက်နမ်၊ အင်ဒိုနီးရှား၊ မလေးရှား၊ မြန်မာ စတဲ့ နိုင်ငံကလူတွေ ဒီလို လူကုန်ကူးခံရတာကို မီဒီယာတွေမှာ မကြာခဏ တွေ့လာရပါတယ်။

Ref: Aljazeera