ယူကရိန်းဒုက္ခသည်များအတွက် ဆော်ဒီက ဒေါ်လာ သန်း ၄၀၀ လှူဒါန်းမည်

အောက်တိုဘာ ၁၅၊ ၂၀၂၂
M-Media

-ရုရှားကျူးကျော်စစ်ကြောင့် အတိဒုက္ခရောက်နေကြတဲ့ ယူကရိန်းပြည်သူတွေအတွက် ဆော်ဒီက ကန်ဒေါ်လာ သန်း ၄၀၀ လှူဒါန်းမယ်လို့ သိရပါတယ်။

ယူကရိန်းသမ္မတ ဇယ်လင်စကီးနဲ့ ပြီးခဲ့တဲ့ရက်ပိုင်းက ဖုန်းပြောဆိုမှုအတွင်း ဆော်ဒီအိမ်ရှေ့မင်းသား မိုဟာမက် ဘင် ဆလ်မန်က ယူကရိန်း ဒုက္ခသည်တွေအတွက် လူသားချင်း စာနာထောက်ထားမှုဆိုင်ရာ အကူအညီပေးအပ်ဖို့ ကတိပြုခဲ့တာ ဖြစ်ပါတယ်။

တင်းမာမှုတွေ လျှော့ချရေးအတွက် တတ်နိုင်တာအားလုံး ဆော်ဒီက ကူညီလုပ်ဆောင်ပေးသွားမှာဖြစ်သလို၊ ကြား၀င်စေ့စပ်ပေးရေးအတွက် အဆင်သင့်ရှိတယ်လို့ အိမ်ရှေ့မင်းသားက ထည့်သွင်းပြောဆိုခဲ့ပါတယ်။

ရုရှားကဖမ်းထားတဲ့ ယူကရိန်းအကျဥ်းသားတွေ လွတ်မြောက်ရေး ပူးပေါင်းဆောင်ရွက်သွားဖို့အတွက် ခေါင်းဆောင်နှစ်ဦးက ဆွေးနွေးမှုမှာ သဘောတူခဲ့ပါတယ်။

ပြီးခဲ့တဲ့လက အမေရိကန်နှစ်ဦးအပါအ၀င် ရုရှားကဖမ်းထားတဲ့ ယူကရိန်းအကျဥ်းသား ၁၀ ဦး လွတ်မြောက်ရေး ကြိုးပမ်းမှုမှာ ဆော်ဒီက အဓိကအခန်းကဏ္ဍကနေ ပါ၀င်ခဲ့ပါတယ်။

ဆော်ဒီဟာ ကုလရဲ့ ရုရှားကျူးကျော်စစ် ဆန့်ကျင်ကန့်ကွက်မှုအားလုံးကို ထောက်ခံမဲပေးထားတဲ့ နိုင်ငံတစ်ခုလည်း ဖြစ်ပါတယ်။

Ref: Arab News