သီရိလင်္ကာအစိုးရသစ်ကို လူထုက မကြိုက်သေး

နို၀င်ဘာ ၃၊ ၂၀၂၂

M-Media 

• 

-သီရိလင်္ကာနိုင်ငံမှာ အစိုးရဆန့်ကျင်ရေး လူထုဆန္ဒပြမှုတွေ တစ်ကျော့ပြန် ဖြစ်လာပါတယ်။ 

မနေ့က ရာနဲ့ချီတဲ့လူတွေဟာ မြို့တော်ကိုလံဘိုမှာ စု၀ေးပြီး ဆန္ဒထုတ်ဖော်ခဲ့ကြတာပါ။ အစိုးရက အခွန်မြှင့်ဖို့ စီစဥ်နေတာ၊ ငွေကြေးဖောင်းပွမှု မြင့်လာတာ၊ လူထုအပေါ် ဖိနှိပ်မှု တိုးလုပ်လာတာတွေကို ဆန့်ကျင်ခဲ့ကြတာ ဖြစ်ပါတယ်။ 

ဆန္ဒပြပွဲကို အတိုက်အခံနိုင်ငံရေးသမားတွက ဦးဆောင်ပြုလုပ်တာဖြစ်ပြီး အရပ်ဖက်အဖွဲ့တွေ၊ အလုပ်သမားသမဂ္ဂတွေနဲ့ ပြည်သူတွေ ပါ၀င်ခဲ့ကြပါတယ်။ 

အစိုးရရဲတပ်ဖွဲ့က ဆန္ဒပြသူတွေကို ပိတ်ဆို့လူစုခွဲမှု ပြုလုပ်ခဲ့ပါတယ်။ 

နိုင်ငံရေးကို ဆယ်စုနှစ်ချီ ကြီးစိုးထားတဲ့ ရာဂျာပက်ဆာ မိသားစုကြောင့် သီရိလင်္ကာဟာ လွတ်လပ်ရေးရပြီးနောက်ပိုင်း အဆိုးရွားဆုံး စီးပွားရေးအကြပ်အတည်းကို ပြီးခဲ့တဲ့နှစ်ကစပြီး ကြုံတွေ့ခဲ့ရပါတယ်။ လူထုဆန္ဒပြမှုကြောင့် ရာဂျာပက်ဆာမိသားစုလည်း ဇူလိုင်လမှာ ထွက်ပြေးခဲ့ရပါတယ်။ 

အဲ့ဒီနောက်ပိုင်း ၀န်ကြီးချုပ်ဟောင်း ရာနီလ် ၀စ်ကရီမီဆင်ဟီက သမ္မတဖြစ်လာပေမယ့် အစိုးရဟောင်းရဲ့ ပေါ်လစီအတိုင်းသာ ဆက်သွားနေတဲ့အတွက် လူထုက မကျေမနပ် ဖြစ်လာတာပါ။ 

နို၀င်ဘာ ၁၄ ရက်နေ့မှာ သီရိလင်္ကာအစိုးရက လာမယ့်နှစ်အတွက် ဘက်ဂျက်ထုတ်ပြန်ဖို့ရှိနေပြီး လူထုကတော့ ဒါကို စောင့်ကြည့်နေပါတယ်။

Ref: Reuters