အမျိုးသမီးများ၏ ပညာရေးကို ပိတ်ပင်သည့် တာလီဘန်ကို ကျောင်းဆရာများ ဆန္ဒပြ

ဒီဇင်ဘာ ၃၀၊ ၂၀၂၂
M-Media

-အမျိုးသမီးတွေကို ပညာသင်ခွင့်ပိတ်ပင်တဲ့ တာလီဘန်ရဲ့ လုပ်ရပ်ကို အာဖဂန်နစ္စတန်က အမျိုးသားကျောင်းဆရာတွေ၊ ကျောင်းသားတွေကပါ ဆန့်ကျင် ဆန္ဒပြလာခဲ့ကြပါတယ်။

ပြီးခဲ့တဲ့နှစ် သြဂုတ်လ အာဖဂန်ကို သိမ်းပိုက်ပြီးနောက်ပိုင်း တာလီဘန်ဟာ အမျိုးသမီးတွေ အလယ်တန်းအဆင့် ပညာသင်ကြားခွင့်ကို ပိတ်ပင်ခဲ့ပြီး၊ ပြီးခဲ့တဲ့တစ်ပတ်မှာတော့ တက္ကသိုလ်တက်ခွင့်ပါ ပိတ်ပင်ခဲ့ပါတယ်။

တာလီဘန်ဟာ အမျိုးသမီးတွေ အလုပ်လုပ်ခွင့်၊ ခရီးသွားလာခွင့်၊ ပန်းခြံသွားရောက်ခွင့်၊ Gym သွားရောက်ခွင့်တွေကိုပါ ပိတ်ပင်ထားပါတယ်။

ဒီလို ပညာသင်ခွင့်ပိတ်ပင်မှုနဲ့ပတ်သက်ပြီး မြို့တော်ကဘူးလ်မှာ အမျိုးသမီးတွေ စုရုံး ဆန္ဒပြနေကြသလို အမျိုးသားကျောင်းဆရာတွေနဲ့ ကျောင်းသားတွေပါ ဆန္ဒပြလှုပ်ရှားမှုထဲ ပါ၀င်လာပါတယ်။

ကဘူးလ်မြို့က Mashal ပုဂ္ဂလိက တက္ကသိုလ်ကို တည်ထောင်သူ ပရော်ဖက်ဆာ အစ္စမာအီလ် မာရှယ်ဟာ တာလီဘန်ရဲ့လုပ်ရပ်ကို ဆန့်ကျင်ပြောကြားတဲ့ မီဒီယာအင်တာဗျူးတစ်ခုမှာ သူ့ရဲ့ ဘွဲ့လက်မှတ်တွေကို ဒေါသတကြီး ဆုတ်ဖြဲခဲ့ပါတယ်။

“ဒီကနေ့ကစပြီး ဘွဲ့လက်မှတ်တွေ မလိုတော့ဘူး။ ဒီတိုင်းပြည်က ပညာရေးကို နေရာမပေးတဲ့ တိုင်းပြည်မျိုးဗျ။ ကျွန်တော့် ညီမအရွယ်၊ အမေအရွယ်တွေ ပညာသင်ခွင့်မရှိတဲ့ ပညာရေးမျိုးကို ကျွန်တော် လက်မခံနိုင်ပါဘူး”

ပြီးခဲ့တဲ့ရက်ပိုင်း ကဘူးလ်တက္ကသိုလ်က စာမေးပွဲတစ်ခုမှာ အမျိုးသားကျောင်းသားတွေဟာ စာမေးပွဲခန်းထဲကနေ ထွက်သွားကာ တာလီဘန်ကို ဆန္ဒပြခဲ့ကြပါတယ်။ နိုင်ငံတစ်၀ှမ်း တက္ကသိုလ်တွေက အမျိုးသား ကျောင်းဆရာတွေ၊ ပရော်ဖက်ဆာတွေလည်း အလုပ်ကနေနှုတ်ထွက်ကာ တာလီဘန်ရဲ့ လုပ်ရပ်ကို ဆန့်ကျင်နေကြတယ်လို့ ဒေသတွင်းမီဒီယာတွေက ဖော်ပြပါတယ်။

အမျိုးသမီးတွေရဲ့ ပညာရေးနဲ့ အလုပ်လုပ်ခွင့်ကို မပိတ်ပင်ဘူးဆိုတဲ့ ကတိက၀တ်မျိုး အာဏာမရခင် အနောက်နိုင်ငံတွေနဲ့ မွတ်စလင်ကမ္ဘာကို တာလီဘန်က ပေးခဲ့ပေမယ့် အာဏာရပြီးနောက်ပိုင်းမှာတော့ ဒီကတိက၀တ်ကို ဖောက်ဖျက်လာတာ ဖြစ်ပါတယ်။

Ref: CNN, ABC

ဓာတ်ပုံ – ဘွဲ့လက်မှတ်များ ဆုတ်ဖြဲခဲ့သည့် ပရော်ဖက်ဆာ အစ္စမာအီလ် မာရှယ်