အစ္စရေးစစ်တပ်၏ သတ်ဖြတ်မှုကြောင့် ပါလက်စတိုင်းတွင် လူ ၉ ဦး သေဆုံး

ဇန်န၀ါရီ ၂၆၊ ၂၀၂၃

M-Media 

-ပါလက်စတိုင်းပိုင် အနောက်ဖက်ကမ်း ဂျီနင်မြို့က ဒုက္ခသည်စခန်းကို အစ္စရေးစစ်တပ်က ၀င်ရောက်စီးနင်း တိုက်ခိုက်မှုအတွင်း အနည်းဆုံး လူ ၉ ဦး သေဆုံးကာ ၂၀ လောက် ဒဏ်ရာရရှိခဲ့ပါတယ်။ 

သေဆုံးသူတွေထဲမှာ အဘွားအိုတစ်ဦးလည်း ပါ၀င်ပါတယ်။ 

အစ္စရေးစစ်တပ်ရဲ့ ထုတ်ပြန်ချက်မှာ Islamic Jihad အဖွဲ့ရဲ့ အဖွဲ့၀င်တွေကို ဖမ်းဆီးဖို့ ၀င်ရောက်စီးနင်းတာလို့ ဖော်ပြထားပါတယ်။ ဂျီနင်က ဒုက္ခသည်စခန်းကို အင်အား အလုံးအရင်းနဲ့ ၀င်ရောက်စီးနင်းတာမျိုးကို အစ္စရေးက ပြီးခဲ့တဲ့နှစ်ကတည်းက စတင်လုပ်ဆောင်လာတာပါ။ 

ပါလက်စတိုင်း တော်လှန်ရေးအဖွဲ့တွေထဲက တစ်ခုဖြစ်တဲ့ Islamic Jihad က အစ္စရေးတပ်ဖွဲ့တွေနဲ့ တိုက်ပွဲဖြစ်ပွားကြောင်း အတည်ပြုပါတယ်။  

တိုက်ခိုက်မှုအတွင်း ၂ ထပ်တိုက် အဆောက်အဦးတစ်ခု လုံး၀ ပျက်ဆီးသွားပြီး၊ သေဆုံးဒဏ်ရာရသူတွေကို ကူညီဖို့ သွားရောက်တဲ့ လူနာတင်ယာဥ်ကို အစ္စရေးတပ်ဖွဲ့က ပေးမ၀င်တာတွေ ရှိတယ်လို့ ဒေသတွင်းမီဒီယာတွေက ဖော်ပြပါတယ်။ 

အနောက်ဖက်ကမ်းမှာ အစ္စရေးရဲ့ သတ်ဖြတ်မှုကြောင့် ဇန်န၀ါရီလအတွင်း သေဆုံးသူ အနည်းဆုံး ၂၉ ဦး ရှိလာပြီး ၁၅ ဦးက ဂျီနင်မှာ ဖြစ်ပါတယ်။

၂၀၂၂ ခုနှစ်မှာ ဒီလိုစီးနင်းမှုတွေကြောင့် ပါလက်စတိုင်း ၁၇၀ ကျော် သေဆုံးခဲ့ပါတယ်။ 

Ref: Aljazeera