ပါလက်စတိုင်းတွင် အခြေချဂျူးများက ဒေသခံပါလက်စတိုင်းများကို တိုက်ခိုက်သတ်ဖြတ်မှု ဆက်တိုက်ဖြစ်နေ

မတ် ၁၊ ၂၀၂၃

M-Media 

– ပါလက်စတိုင်းနိုင်ငံ အနောက်ဖက်ကမ်းဒေသက အစ္စရေးရဲ့ တရားမ၀င်အိမ်ယာတွေမှာ နေထိုင်နေတဲ့ ဂျူးတွေဟာ ပါလက်စတိုင်းတွေကို တိုက်ခိုက်သဖြတ်နေတာ ၃ ရက်ဆက်ရှိလာပြီ ဖြစ်ပါတယ်။ 

လူဦးရေ ရာချီရှိတဲ့ ဂျူးအခြေချသူတွေဟာ နဘလုစ်၊ ဟာ၀ါရာနဲ့ အနောက်ဖက်ကမ်းက တခြားမျိုးတွေမှာ ပါလက်စတိုင်းတွေရဲ့ အိမ်တွေ၊ စျေးဆိုင်တွေ၊ ကားတွေကို မီးရှို့ဖျက်ဆီးတာ၊ လူတွေကို ရိုက်နှက်တာ သေနတ်နဲ့ ပစ်ခတ်တာတွေကို တနင်္ဂနွေနေ့ကတည်းက စတင်လုပ်ဆောင်လာကြတာ ဖြစ်ပါတယ်။ 

မနေ့ကအထိ အနည်းဆုံး ပါလက်စတိုင်း ၂ ဦးသေဆုံးကာ ၃၉၀ လောက် ဒဏ်ရာရခဲ့ပြီး၊ အိမ်ခြေ ၃၀၊ ကား ၁၀၀ ကျော် ဖျက်ဆီးခံလိုက်ရတယ်လို့ ပါလက်စတိုင်း အာဏာပိုင်အဖွဲ့က ထုတ်ပြန်ပါတယ်။ 

အစ္စရေးအစိုးရနဲ့ လုံခြုံရေးတပ်ဖွဲ့တွေက ဒီလို အုပ်စုဖွဲ့ တိုက်ခိုက်သတ်ဖြတ်မှုတွေကို တားမြစ်ခြင်းမရှိသလို၊ အရေးယူမှုလည်း မရှိပါဘူး။ 

အစ္စရေးတပ်ဖွဲ့တွေ၊ ဂျူးအခြေချနေထိုင်သူတွေ၊ လက်ယာစွန်းရောက်ဂျူးတွေက ဂျေရုစလင်မှာရှိတဲ့ အလ်အက္ကဆွာဗလီကို ကျူးကျော်၀င်ရောက် စော်ကားရာကနေ ပါလက်စတိုင်းမှာ အခုနှစ်အစောပိုင်းကစပြီး တင်းမာမှုတွေ မြင့်တက်လာပါတယ်။ 

အစ္စရေးတပ်ဖွဲ့တွေဟာ ပါလက်စတိုင်း ဒုက္ခသည်စခန်းပါမကျန် စီးနင်းတိုက်ခိုက်မှုတွေ လုပ်ဆောင်လာပြီး အခုနှစ်အတွင်း အစ္စရေးစစ်တပ်နဲ့ ဂျူးအခြေချနေထိုင်သူတွေလက်ချက်ကြောင့် သေဆုံးခဲ့ရတဲ့ ပါလက်စတိုင်းပြည်သူအရေအတွက်ဟာ ၆၄ ဦး ရှိလာပြီဖြစ်ပါတယ်။ 

ပါလက်စတိုင်းဖက်ကလည်း တုန့်ပြန်တိုက်ခိုက်မှုတွေ လုပ်ဆောင်တာကြောင့် အစ္စရေးဖက်က ၁၄ ဦး သေဆုံးခဲ့ပါတယ်။ 

Ref: Arab News