မတ်လ ၁၅ ရက်နေ့ကို အစ္စလာမ်ကြောက်ရောဂါ တိုက်ဖျက်ရေးနေ့အဖြစ် ကုလက သတ်မှတ်

မတ် ၁၆၊ ၂၀၂၃

M-Media 

-နှစ်စဥ် မတ်လ ၁၅ ရက်နေ့ကို အစ္စလာမ်ကြောက်ရောဂါ တိုက်ဖျက်ရေးနေ့အဖြစ် ကုလသမဂ္ဂက သတ်မှတ်လိုက်ပါတယ်။ 

အစ္စလာမ်ဘာသာ၀င်တွေအပေါ် မုန်းတီးတာတွေ၊ ခွဲခြားဆက်ဆံတာတွေနဲ့ အကြမ်းဖက်တာတွေကို ထိထိရောက်ရောက် ဖြေရှင်းရေးအတွက် ရည်ရွယ်တာလို့ ကုလရဲ့ ထုတ်ပြန်ချက်မှာ ဖော်ပြထားပါတယ်။ 

ကုလအတွင်းရေးမှူးချုပ် အန်တိုနီယို ဂူတာရက်စ်က မွတ်စလင်မုန်းတီးရေးသဘောထားတွေကို တိုက်ဖျက်ဖို့အတွက် ဒီလိုနေ့မျိုး သတ်မှတ်ခဲ့တာလို့ ဆိုပါတယ်။ 

“ခွဲခြားဆက်ဆံမှုတွေက ကျွန်တော်တို့အားလုံးကို ဆွဲချသွားမှာပါ။ ဒါကို ကျွန်တော်တို့ မဖြစ်မနေ ဆန့်ကျင်တိုက်ဖျက်ဖို့ လိုပါတယ်။ ဒီနေ့ကစပြီး နေ့စဥ်နေ့တိုင်း လူ့အဖွဲ့အစည်းကို သွေးကွဲစေတဲ့ အင်အားစုတွေကို တိုက်ဖျက်ကာ လူသား၀ါဒကို ပိုမို ခိုင်မာစေရမှာ ဖြစ်ပါတယ်” လို့ Twitter စာမျက်နှာမှာ ရေးသားခဲ့ပါတယ်။

မတ်လ ၁၅ ရက်နေ့ကို အစ္စလာမ်ကြောက်ရောဂါ တိုက်ဖျက်ရေးနေ့အဖြစ် သတ်မှတ်ဖို့ ပါကစ္စတန်နဲ့ OIC အဖွဲ့က ပြီးခဲ့တဲ့နှစ် ကုလအထွေထွေညီလာခံမှာ တင်ပြခဲ့တာပါ။

ကုလအထူးကိုယ်စားလှယ်ရဲ့ မကြာသေးခင်က ဘာသာရေးလွတ်လပ်ခွင့် အစီရင်ခံစာမှာ မွတ်စလင်တွေအပေါ် သံသယဖြစ်မှု၊ ခွဲခြားမှုနဲ့ အသားလွတ်မုန်းတီးမှုတွေဟာ ကပ်ရောဂါအနေအထားသဖွယ် ဖြစ်လာတယ်လို့ ဖော်ပြထားပါတယ်။ 

အစ္စလာမ်ဘာသာ၀င် လူနည်းစုရှိတဲ့ နိုင်ငံတွေမှာဆိုရင် အလုပ်ရရှိရေး၊ ပညာရေးကနေ ၀န်ဆောင်မှုနဲ့ ကုန်ပစ္စည်း၀ယ်ယူရေးအထိပါ ခွဲခြားဆက်ဆံခံနေရပြီး တစ်ချို့နိုင်ငံတွေမှာ နိုင်ငံသားဖြစ်ခွင့်၊ အမှတ်သညာတစ်ခု သတ်မှတ်ပိုင်ခွင့်တွေပါ ဆုံးရှုံးနေတယ်ဆိုတာ တွေ့ရကြောင်း အစီရင်ခံစာက ဆိုပါတယ်။ 

Ref: Aljazeera