ဧပြီ ၁၊ ၂၀၂၃
M-Media
-ထိုင်း၀န်ကြီးချုပ်ဟောင်း သက်ဆင် ရှင်နာ၀ပ်ထရာရဲ့ သမီးဖြစ်သူ အသက် ၃၆ နှစ်အရွယ် ပေတွန်တန် ရှင်နာ၀ပ်ထရာဟာ အာဏာသိမ်းစစ်ခေါင်းဆောင် ပရာယွတ်ချန်အိုချာကို ဖြုတ်ချဖို့ ကြိုးပမ်းလာပါတယ်။
ထိုင်းနိုင်ငံမှာ မေလ ၁၄ ရက်နေ့ ရွေးကောက်ပွဲ ကျင်းပြုလုပ်ဖို့ ရှိနေပြီး သက်ဆင်မိသားစုရဲ့ Phue Thai ပါတီဟာ ကျေးလက်ဒေသတွေမှာ ထောက်ခံမှု အကြီးအကျယ် ရနေပါတယ်။
၂၀၀၈ ခုနှစ် စစ်တပ်က အာဏာသိမ်းတဲ့အချိန် သက်ဆင်ဟာ တိုင်းပြည်က ထွက်ပြေးခဲ့ရပြီး အဲဒီနောက်ပိုင်း မဲနိုင်ကာ ၀န်ကြီးချုပ်ဖြစ်လာတဲ့ သက်ဆင်ညီမ ယင်လပ်လည်း ၂၀၁၄ ခုနှစ်မှာ ပရာယွတ်ရဲ့ အာဏာသိမ်းမှုကို ခံရကာ ထွက်ပြေးခဲ့ရပါတယ်။
“စစ်အာဏာသိမ်းမှုနှစ်ခုမှာ လူကောင်းနှစ်ဦး တိုင်းပြည်ကို စွန့်ခွာခဲ့ရပါတယ်။ ဒီတစ်ကြိမ်မှာလည်း Pheu Thai ပါတီ တောင်ပြို၊ ကမ်းပြို အနိုင်ရအောင် ကြိုးစားပေးပါလို့ တောင်းဆိုပါတယ်” လို့ ပေတွတန်က မဲဆွယ်ပွဲတစ်ခုမှာ ပြောကြားခဲ့ပါတယ်။
Phue Thai ပါတီနဲ့ မဟာမိတ်တွေဟာ ၂၀၀၁ ခုနှစ်ကစပြီး လုပ်ခဲ့တဲ့ ရွေးကောက်ပွဲတွေမှာ မဲအများစု ရရှိခဲ့တဲ့ ပါတီလည်းဖြစ်ပါတယ်။
သက်ဆင်ရဲ့သမီး ပေတွန်တန်ဟာ ၂၀၂၁ ခုနှစ်က နိုင်ငံရေးလောကထဲ ၀င်ရောက်လာခဲ့ပြီး အချိန်တိုတိုနဲ့ လူထုထောက်ခံမှု ရရှိလာပါတယ်။ မကြာသေးခင်က ပြုလုပ်တဲ့ စစ်တမ်းကောက်ယူမှုမှာဆိုရင် အာဏာသိမ်းစစ်ခေါင်းဆောင် ၀န်ကြီးချုပ် ပရာယွတ်ထက်ကို လူထုထောက်ခံမှု ၂ ဆကျော်ရတာ တွေ့ရပါတယ်။
ပရာယွတ်က ရေးဆွဲအတည်ပြုထားတဲ့ အခြေခံဥပဒေသစ်အရ စစ်တပ်မဟာမိတ်အများအပြားနဲ့ ဖွဲ့စည်းထားတဲ့ အထက်လွှတ်တော်ဟာ ၂၀၂၄ ခုနှစ်အထိ ၀န်ကြီးချုပ်ကို တင်မြှောက်ခွင့်ရှိနေပြီး အောက်လွှတ်တော် အမတ် ၅၀၀ မှာ ၃၇၆ နေရာ အနိုင်ရမှ အထက်လွှတ်တော်ရဲ့ အာဏာကို အနိုင်ရပါတီက ကျော်နိုင်မှာ ဖြစ်ပါတယ်။
Ref: The Star