အာဏာရှင်အဖိုး၏ လုပ်ရပ်များအတွက် မြေးဖြစ်သူက ပြန်တောင်းပန်

ဧပြီ ၁၊ ၂၀၂၃

M-Media 

-အဖိုးစစ်အာဏာရှင်က ပြည်သူလူထုအပေါ် နှိပ်စက်ညှင်းပမ်းခဲ့တာတွေနဲ့ပတ်သက်ပြီး မြေးဖြစ်သူက ပြန်လည်တောင်းပန်မှုတစ်ခု ပြီးခဲ့တဲ့ရက်ပိုင်းမှာ ဖြစ်ပွားခဲ့ပါတယ်။ 

တောင်ကိုရီးယားနိုင်ငံမှာ ဖြစ်ပါတယ်။ အသက် ၂၇ နှစ်အရွယ် ချန်၀ူး၀ွန်က သူ့အဖိုး ချန်ဒူး၀မ်ဟာ အပြစ်ရှိသူ၊ လူသတ်သမားဖြစ်တယ်ဆိုတာ မနေ့က ဂွမ်ဂျူးမြို့ အမျိုးသားသုသာန်မှာ ပြုလုပ်တဲ့ အခမ်းအနားမှာ ၀န်ခံခဲ့ပါတယ်။ 

၁၉၈၀ ပြည့်နှစ် အာဏာသိမ်းပြီး သိပ်မကြာခင်မှာ ချန်ဒူး၀မ်ဟာ ဂွမ်ဂျူးမြို့က ဆန္ဒပြပြည်သူတွေကို အကြမ်းဖက်ဖြိုခွဲခဲ့ပြီး သေဆုံးသူနဲ့ ပျောက်ဆုံးသူ စုစုပေါင်း ၂၀၀ ကျော် ရှိခဲ့ပါတယ်။ 

စစ်သားတွေဟာ ဆန္ဒပြသူတွေကို နှိပ်စက်သတ်ဖြတ်တာ၊ အမျိုးသမီးတွေကို အဓမ္မကျင့်တာတွေ ကျူးလွန်ခဲ့ပြီး လူအုပ်ထဲကို ရဟတ်ယာဥ်နဲ့ ပစ်ခတ်တာတွေပါ လုပ်ဆောင်ခဲ့ပါတယ်။ 

ဒီအဖြစ်အပျက်အတွင်း ချန်ဒူး၀မ်ဟာ တိုက်လေယာဥ်တွေမှာ ဗုံးတွေတပ်ပြီး အဆင်သင့်ပြင်ထားဖို့ အမိန့်ပေးခဲ့ပါတယ်။ မျက်မြင်သက်သေတွေက သေဆုံးသူအရေအတွက်ဟာ တရား၀င် ထုတ်ပြန်တာထက် ပိုမိုများပြားတယ်လို့ ဆိုပါတယ်။ 

အသက်ရှင်ကျန်ရစ်သူတွေ၊ သေဆုံးသွားသူရဲ့ မိသားစု၀င်တွေကို ကန့်တော့ခဲ့တဲ့ ချန်၀ူး၀ွန်က သူ့အဖိုးရဲ့ စစ်အာဏာရှင်စနစ်အပေါ် ဆန့်ကျင်ခဲ့သူတွေရဲ့ သတ္တိကို ချီးကျူးတယ်လို့ မနေ့ကအခမ်းအနားမှာ ထည့်သွင်းပြောကြားခဲ့ပါတယ်။ 

သူ့အဖိုးဟာ ကြီးမားတဲ့ ရာဇ၀တ်မှုကို ကျူးလွန်ခဲ့ကြောင်း၊ မိမိအနေနဲ့ အရင်ကတည်းက မတောင်းပန်ခဲ့မိတဲ့အတွက် ၀မ်းနည်းမိကြောင်း ပြောခဲ့ပါတယ်။  

ချန်ဒူး၀မ်ရဲ့ အာဏာရှင်စနစ်ဟာ ၁၉၈၈ ခုနှစ်မှာ အဆုံးသတ်ခဲ့ပါတယ်။ နိုင်ငံတော် သစ္စာဖောက်မှု၊ ခြစားမှုတွေနဲ့ ၁၉၉၆ ခုနှစ်မှာ တရားစွဲ ထောင်ချခံခဲ့ရပေမယ့် နောက်ပိုင်းမှာ သမ္မတလွတ်ငြိမ်းချမ်းသာခွင့်နဲ့ ပြန်လွတ်လာခဲ့ပြီး အသက် ၉၀ အရွယ် ၂၀၂၁ ခုနှစ်မှာ ကွယ်လွန်ခဲ့ပါတယ်။ 

Ref: BBC