အကောင်းဆုံးဆုကို စံချိန်တင်ပြီး ရယူနိုင်ခဲ့တဲ့ ဟာလန်း

မေ ၁၃၊ ၂၀၂၃

M-Media

-ဘောလုံးအားကစား ဂျာနယ်လစ်အသင်း (FWA) က ရွေးချယ်ချီးမြှင့်တဲ့ တစ်နှစ်တာအကောင်းဆုံး ဘောလုံးသမားဆုကို မန်စီးတီးတိုက်စစ်မှူး အာလင် ဟာလန်းက ရရှိသွားပါတယ်။ 

မဲပေးမှု စုစုပေါင်းရဲ့ ၈၂ ရာခိုင်နှုန်းကို ဟာလန်းက ရရှိကာ အာဆင်နယ်တိုက်စစ်မှူး ဘူကာယို ဆာကာ၊ ကွင်းလယ်လူ အိုဒီဂတ်တို့ကို ကျော်ဖြတ်နိုင်ခဲ့တာ ဖြစ်ပါတယ်။ 

၈၂ ရာခိုင်နှုန်းဟာ FWA ဆုသမိုင်းမှာ အမြင့်ဆုံးရရှိတဲ့ စံချိန်လည်း ဖြစ်ပါတယ်။ 

“အင်္ဂလိပ်ဘောလုံးလောကမှာ ပထမတစ်နှစ်ထဲနဲ့ FWA ဆုကို ရရှိတဲ့အတွက် ဂုဏ်ယူမိပါတယ်။ အကောင်းဆုံးဖြစ်အောင်လို့ နေ့စဥ်နေ့တိုင်း ကျွန်တော်ကြိုးစားတယ်။ ဒီလိုအသိအမှတ်ပြုခံရတာဟာ ကျွန်တော့်အတွက် အဓိပ္ပါယ်အများကြီး ရှိပါတယ်”

“မန်စီးတီးမှာ ကုန်ဆုံးရတဲ့ အချိန်တိုင်းကို ကျွန်တော်ပျော်တယ်။ အသင်းဖော်တွေဟာ မယုံနိုင်လောက်အောင် ကောင်းတယ်။ သူတို့ဖန်တီးပေးလို့ ကျွန်တော် ဂိုးတွေရတာပါ။ သူတို့မရှိဘဲနဲ့ ကျွန်တော် ဒီဆုကို မရနိုင်ပါဘူး။ အသင်းဖော်တွေကို ကျေးဇူးတင်ကြောင်း ပြောပါရစေ” 

ဟာလန်းဟာ မန်စီးတီးအသင်းအတွက် ပြိုင်ပွဲပေါင်းစုံ ၅၁ ဂိုး သွင်းယူထားပြီး ပရီးမီးယားလိဂ်မှာ သွင်းဂိုး ၃၅ ဂိုးနဲ့ တစ်ရာသီအတွင်း ဂိုးအများဆုံးသွင်းသူအဖြစ် စံချိန်သစ် တင်ထားနိုင်ပါတယ်။ 

Ref : ESPN