ထိုင်းအာဏာသိမ်းစစ်ခေါင်းဆောင် နိုင်ငံရေးကို ကျောခိုင်းဖွယ်ရှိ

မေ ၁၆၊ ၂၀၂၃

M-Media 

-တနင်္ဂနွေနေ့က ရွေးကောက်ပွဲမှာ အပြတ်အသတ် ရှုံးနိမ့်ခဲ့တဲ့ ၀န်ကြီးချုပ် ပရာယွတ်ချန်အိုချာဟာ နိုင်ငံရေးကနေ အနားယူဖွယ်ရှိတယ်လို့ သတင်းထွက်လာပါတယ်။ 

အသက် ၆၉ နှစ်အရွယ် ပရာယွတ်ရဲ့ United Thai Nation ပါတီဟာ ၃၆ နေရာသာ အနိုင်ရပြီး အရှက်ကွဲခဲ့ပါတယ်။

ပါတီဒုဥက္ကဌအဖြစ် တာ၀န်ယူထားတဲ့ သာနာခွန် ၀မ်ဘွန်ခွန်ချာနာက ပရာယွတ်ဟာ နိုင်ငံရေးဆက်လုပ်မယ်လို့ မထင်ကြောင်း ပြောကြားခဲ့ပါတယ်။ 

“သူက ထုတ်တော့ မပြောပါဘူး။ သူ့ရဲ့နိုင်ငံရေးသမားဘ၀ အဆုံးသတ်မယ်လို့ ကျွန်တော် ထင်ပါတယ်”

ပရာယွတ်ဟာ ၂၀၁၄ ခုနှစ် အာဏာသိမ်းပြီးနောက်ပိုင်း ထိုင်းနိုင်ငံကို အုပ်စိုးလာတာ ဖြစ်ပါတယ်။ တိုင်းပြည်ကို စစ်ခေါင်းဆောင်တွေက ခြယ်လှယ်နိုင်ဖို့ အခြေခံဥပဒေကို စိတ်ကြိုက်ရေးဆွဲခဲ့သူပါ။

ဒါပေမယ့် ထိုင်းပြည်သူလူထုက ပရာယွတ်နဲ့ သူ့ရဲ့ အပေါင်းအပါတွေ တည်ထောင်ထားတဲ့ ပါတီတွေကို ရွေးကောက်ပွဲမှာ ပြတ်ပြတ်သားသား ဆန့်ကျင်ခဲ့ပါတယ်။ 

ရွေးကောက်ပွဲမှာ လူငယ်ပညာတတ် ပီတ လင်မ်ဂျာရိုနရတ် ဦးဆောင်တဲ့ Move Forward ပါတီက မဲအများဆုံးရခဲ့ပြီး၊ စစ်တပ်ရဲ့ ဖြုတ်ချမှုကို ခံခဲ့ရတဲ့ ၀န်ကြီးချုပ်ဟောင်း သက်ဆင်ရဲ့သမီး ဦးဆောင်တဲ့ Pheu Thai ပါတီက ဒုတိယအများဆုံး ရခဲ့ပါတယ်။ 

ဒါပေမယ့် စစ်တပ်ကျောထောက်နောက်ခံပြုထားတဲ့ အထက်လွှတ်တော်က အတည်ပြုမှသာ အနိုင်ရပါတီတွေက လွတ်လွတ်လပ်လပ် အစိုးရဖွဲ့ခွင့်ရမှာ ဖြစ်ပါတယ်။ 

Ref: CNA