အိမ်အမြန်ပြန်ခွင့်ရရေး ရိုဟင်ဂျာများ တောင်းဆို

ဇွန် ၁၀၊ ၂၀၂၃

M-Media 

-ဒုက္ခဆင်းရဲများတဲ့ ဘင်္ဂလားဒေ့ရှ် ဒုက္ခသည်စခန်းတွေကနေ မွေးရပ် ရခိုင်ပြည်နယ်ကို အမြန်ဆုံး ပြန်နိုင်ရေးအတွက် ရိုဟင်ဂျာတွေက ကြာသာပတေးနေ့မှာ တောင်းဆိုခဲ့ကြပါတယ်။ 

ရခိုင်ပြည်နယ်က ရိုဟင်ဂျာတွေဟာ ၁၉၇၀ ပြည့်နှစ်တွေက စတင်ကာ မြန်မာစစ်တပ်ရဲ့ ဖိနှိပ်ညှင်းပမ်း၊ သတ်ဖြတ်မောင်းထုတ်မှုကို ခံစားခဲ့ရတာပါ။ 

၂၀၁၂၊ ၂၀၁၇ နဲ့ ၂၀၁၈ ခုနှစ် ရိုဟင်ဂျာတွေ ညှင်းပမ်းခံရမှုကို ကမ္ဘာက ပိုမို အာရုံစိုက်လာခဲ့ပါတယ်။ လက်ရှိ ဘင်္ဂလားဒေ့ရှ်က ဒုက္ခသည်စခန်းတွေမှာ ခိုလှုံနေရတဲ့ ရိုဟင်ဂျာအရေအတွက်က ၁ သန်းလောက် ရှိနေပါတယ်။ 

ကြာသာပတေးနေ့ ဆန္ဒပြပွဲမှာ ရိုဟင်ဂျာ ထောင်သောင်းချီ ပါ၀င်ခဲ့ကြပြီး ဒုက္ခသည်ဘ၀၊ အသိအမှတ်ပြု မခံရမှုတွေကို မလိုချင်တော့ဘဲ မွေးရပ်မြေကို အမြန်ဆုံးပြန်ချင်တယ်လို့ တောင်းဆိုခဲ့ကြပါတယ်။ 

“ကျွန်တော်တို့တွေဟာ မွေးရာပါ မြန်မာနိုင်ငံသားတွေပါ။ နိုင်ငံသားဖြစ်ခွင့်၊ လွတ်လပ်စွာ သွားလာခွင့်၊ အလုပ်လုပ်ကိုင်ခွင့်၊ လုံခြုံဘေးကင်းမှုတို့အပါအ၀င် ကျွန်တော်တို့ရဲ့ အခွင့်အရေး အပြည့်အ၀နဲ့ အိမ်ကို ပြန်ချင်ပါတယ်” လို့ ရိုဟင်ဂျာခေါင်းဆောင်တစ်ဦးဖြစ်တဲ့ မိုဟာမက် ဂျာရှင်မ်က ပြောပါတယ်။

၂၀၁၈ နဲ့ ၂၀၁၉ ခုနှစ်မှာ ရိုဟင်ဂျာတွေ နေရပ်ပြန်နိုင်ရေး မြန်မာနဲ့ ဘင်္ဂလားဒေ့ရှ်အစိုးရတို့အကြား ကြိုးပမ်းခဲ့ကြပေမယ့် မအောင်မြင်ခဲ့ပါဘူး။ 

လက်ရှိ အာဏာသိမ်းစစ်ကောင်စီလက်ထက်မှာ ရှေ့ပြေးစီမံကိန်းအဖြစ် ရိုဟင်ဂျာ ဒုက္ခသည် ၁၁၀၀ လောက်ကို ပြန်လည်လက်ခံဖို့ ဘင်္ဂလားဒေ့ရှ်နဲ့ ဆွေးနွေးထားပါတယ်။ ပြန်ခေါ်မယ့် ရက်အတိအကျကို သတ်မှတ်ရခြင်း မရှိသေးပါဘူး။

ရိုဟင်ဂျာဒုက္ခသည်တွေရဲ့ စား၀တ်နေရေးကို အဓိက တာ၀န်ယူထားတဲ့ ကုလ စားနပ်ရိက္ခာအဖွဲ့ WFP ကလည်း ရိုဟင်ဂျာတွေအပေါ် ထောက်ပံ့နေတဲ့ ရန်ပုံငွေကို မကြာသေးခင်က ထပ်မံ လျှော့ချခဲ့ပါတယ်။ 

“ကျွန်တော်တို့ရဲ့အခြေနေဟာ ပိုဆိုးလာတယ်။ ဒီမှာ ဘာအနာဂတ်မှ မရှိပါဘူး။ စီစစ်လက်ခံရေးဆိုတဲ့ ခေါင်းစဥ်နဲ့ မြန်မာဖက်က အချိန်ဆွဲနေတာပါ” လို့ ဆန္ဒပြမှုမှာ ပါ၀င်တဲ့ ဒုက္ခသည် မိုဟာမက် တာဟာရ်က ပြောပါတယ်။ 

Ref: Reuters