ဉာဏ်ရည်တုနည်းပညာအန္တရာယ်အကြောင်း ကုလတွင် ပထမဆုံးအကြိမ် ဆွေးနွေး

ဇူလိုင် ၁၈၊ ၂၀၂၃

M-Media

– ဉာဏ်ရည်တုနည်းပညာ (AI) နဲ့ပတ်သက်ပြီး ရှေ့ဆက် ရင်ဆိုင်ရနိုင်တဲ့ စိန်ခေါ်မှုတွေအကြောင်းကို ကုလသမဂ္ဂ လုံခြုံရေးကောင်စီမှာ မနေ့က ဆွေးနွေးခဲ့ကြပါတယ်။ 

ကုလ အထွေထွေအတွင်းရေးမှူး အန်တိုနီယို ဂူတာရက်စ်က AI ကို စစ်ဖက်နဲ့ အရပ်ဖက်မှာ လွန်လွန်ကျူးကျူး အသုံးပြုရင် ကမ္ဘာ့ငြိမ်းချမ်းရေးနဲ့ လုံခြုံရေးကို ထိခိုက်နိုင်တယ်လို့ သတိပေးခဲ့ပါတယ်။ 

အစည်းအ၀ေးမှာ ကမ္ဘာတစ်၀ှမ်း AI အသုံးပြုမှုနဲ့ပတ်သက်ပြီး ဥပဒေ သတ်မှတ်ချက်တွေ ပြဌာန်းဖို့၊ စောင့်ကြည့်အဖွဲ့ ဖွဲ့စည်းကာ ထိန်းသိန်းဖို့ ဆွေးနွေးခဲ့ကြပါတယ်။ 

ဗြိတိန်နိုင်ငံခြားရေး၀န်ကြီး ဂျိမ်းစ် ကလီဗာလီက AI ဟာ လူသားတွေရဲ့ နိစ္စဓူ၀ အခြေအနေတိုင်းကို ပြောင်းလဲစေနိုင်ပြီး၊ နယ်နမိတ်ကန့်သတ်ချက်မျိုး မရှိတဲ့အတွက် နိုင်ငံတကာအဆင့် စောင့်ကြည့်ထိန်းသိမ်းဖို့ လိုအပ်တယ်လို့ ထောက်ပြ ပြောဆိုခဲ့ပါတယ်။

AI ကို စစ်ပွဲနဲ့ လက်နက်ထုတ်လုပ်မှု၊ ပြည်သူလူထုကို ဖိနှိပ်မှုတွေမှာ အသုံးမပြုဖို့လည်း အစည်းအ၀ေးမှာ ဆွေးနွေးခဲ့ကြပါတယ်။ 

ကုလဆိုင်ရာ တရုတ်သံအမတ်က AI ဟာ အသွားနှစ်ဖက်နဲ့ဓားဖြစ်ကြောင်း၊ တစ်နိုင်ငံတည်းက ဒီနည်းပညာကို လက်၀ါးကြီးအုပ် သုံးစွဲမှုကို တားမြစ်ဖို့လိုကြောင်း ပြောကြားခဲ့ပါတယ်။ 

ကုလဆိုင်ရာ အမေရိကန် ဒုသံအမတ်က AI နဲ့ အခြားနည်းပညာသစ်တွေကို အသုံးပြုပြီး လူ့အခွင့်အရေး ချိုးဖောက်မှုတွေကို တားဆီးရေး ကမ္ဘာကြီးက အတူတကွ လုပ်ဆောင်ဖို့ လိုအပ်တယ်လို့ ဆိုပါတယ်။  

Ref : Reuters