ကုရ်အာန်ကျမ်းစာ မီးရှို့မှုကို ဥပဒေဖြင့်တားဆီးနိုင်ရေး ဒိန်းမတ်နှင့် ဆွီဒင် စီစဥ်နေ

ဇူလိုင် ၃၁၊ ၂၀၂၃

M-Media 

-အခြားနိုင်ငံ သံရုံးတွေရှေ့မှာ ကုန်အာန်ကျမ်းစာ မီးရှို့တဲ့ လုပ်ရပ်တွေကို ဥပဒေထုတ် တားဆီးနိုင်ဖို့ အစိုးရက ဆောင်ရွက်မယ်လို့ ဒိန်းမတ် နိုင်ငံခြားရေး၀န်ကြီး Lars Lokke Rasmussen က ပြောကြားလိုက်ပါတယ်။

“ဒီလိုမီးရှို့တာတွေဟာ လူတစ်ချို့က ဆောင်ရွက်တဲ့ အဆင်ခြင်မဲ့ စော်ကားတဲ့ လုပ်ရပ်တွေပါ။ အဲဒီလူတစ်ချို့ဟာ ဒိန်းမတ်လူ့အဖွဲ့အစည်းကို တည်ဆောက်ထားတဲ့ တန်ဖိုးတွေကို ကိုယ်စား မပြုပါဘူး” လို့ နိုင်ငံခြားရေး၀န်ကြီးရဲ့ မနေ့က ထုတ်ပြန်ချက်မှာ ဖော်ပြထားပါတယ်။ 

အခြားနိုင်ငံတွေရဲ့ ယဥ်ကျေးမှု၊ ဘာသာတရားတွေကို စော်ကားတဲ့ လုပ်ရပ်မျိုး၊ လုံခြုံရေးကိစ္စသာမကဘဲ ဒိန်းမတ်နိုင်ငံအတွက် အနှုတ်လက္ခဏာဆောင်စေတဲ့ လုပ်ရပ်မျိုးလို အထူးအခြေအနေအမျိုးတွေမှာ အစိုးရက ၀င်ရောက်ဟန့်တားနိုင်မယ့် နည်းလမ်းတွေကို ရှာဖွေနေတယ်လို့လည်း Rasmussen က ထည့်သွင်းပြောဆိုခဲ့ပါတယ်။  

ဒိန်းမတ်နဲ့ ဆွီဒင်နိုင်ငံတွေမှာ လက်ယာအစွန်းရောက်တွေက ကုရ်အာန်ကျမ်းစာ မီးရှို့မှုတွေ မကြာခဏ လုပ်ဆောင်လေ့ရှိပါတယ်။ ဒီအတွက် ကမ္ဘာတစ်၀ှမ်းက ပြင်းပြင်းထန်ထန် ဆန့်ကျင်မှုတွေ ရှိလာတာကြောင့် အခုလို ဥပဒေနဲ့ တားမြစ်ဖို့ ကြိုးစားလာတာ ဖြစ်ပါတယ်။ 

ဆွီဒင်၀န်ကြီးချုပ်ရဲ့ မနေ့က ထုတ်ပြန်ချက်မှာ ကုရ်အာန်ကျမ်းစာ မီးရှို့မှုကို ဥပဒေနဲ့ တားဆီးနိုင်ရေးအတွက် ဒိန်းမတ်နိုင်ငံနဲ့ ပူးပေါင်းကာ ဆောင်ရွက်နေတယ်လို့ ဖော်ပြထားပါတယ်။ 

ဒိန်းမတ်နိုင်ငံခြားရေး၀န်ကြီးက ဥပဒေနဲ့ တားဆီးမှုတွေဟာ ဖွဲ့စည်းပုံ အခြေခံဥပဒေက အာမခံထားတဲ့ လွတ်လပ်စွာ ထုတ်ဖော်ပြောဆိုခွင့်ကို မထိခိုက်စေမယ့် ရှုထောင့်မျိုးကနေ လုပ်ဆောင်သွားမယ်လို့လည်း ထည့်သွင်းပြောဆိုခဲ့ပါတယ်။ 

Ref: Aljazeera