နှစ်ပေါင်း ၆၀၀ ကျော် တည်တံ့နေသည့် ဖိလစ်ပိုင်မှ သမိုင်း၀င် ဗလီ

သြဂုတ် ၁၃၊ ၂၀၂၃

M-Media 

-ဖိလစ်ပိုင်နိုင်ငံတောင်ပိုင်းက တာ၀ီ-တာ၀ီဆိုတဲ့ မြို့လေးမှာ ရှေးဟောင်း သမိုင်း၀င် အမျိုးသားအမွေအနှစ်အဖြစ် သတ်မှတ်ခံထားရတဲ့ ဗလီ၀တ်ကျောင်းတော်တစ်လုံး ရှိနေပါတယ်။ 

ရှိခ် ကာရီမွလ် မက််ခ်ဒွမ် ဗလီလို့ အမည်ရပြီး ၁၃၈၀ ခုနှစ်က တည်ဆောက်ခဲ့တာလို့ ဒေသတွင်း မှတ်တမ်းတွေက ဆိုပါတယ်။ အာရပ်လူမျိုး ကုန်သည်နဲ့ သာသနာပြု မက်ခ်ဒွမ် ကရင်မ်က တည်ဆောက်ခဲ့တာဖြစ်ပြီး သူ့အမည်ကို အစွဲပြု မှည့်ခေါ်ထားတာပါ။ 

အရှေ့တောင်အာရှဒေသအတွင်း ရှေးအကျဆုံး ဗလီ၀တ်ကျောင်းတော်တွေထဲက တစ်ခုလည်း ဖြစ်ပါတယ်။ 

“၁၄ ရာစုမှာ တည်ဆောက်ခဲ့တဲ့ ရှိခ် မက်ခ်ဒွမ် ဗလီ၀တ်ကျောင်းတော်ဟာ ဖိလစ်ပိုင်မှာ အစ္စလာမ်သာသနာ စတင်ပြန့်ပွားမှုကို ဖော်ကျူးနေတာ ဖြစ်ပါတယ်” လို့ ဖိလစ်ပိုင်တက္ကသိုလ် အစ္စလာမ့်ရေးရာ လေ့လာမှုဌာနက ပရော်ဖက်ဆာ ဂျူကီပလီ ၀ါဒီက ပြောပါတယ်။ 

အရှေ့တောင်အာရှ တစ်စိတ်တစ်ပိုင်းကို စပိန်တွေက ကျူးကျော်သိမ်းပိုက်ပြီး အနောက်တိုင်း ခရစ်ယာန်ပုံစံ မသွတ်သွင်းခင် နှစ် ၂၀၀ လောက်စောပြီး ဖိလစ်ပိုင်မှာ အစ္စလာမ်သာသနာ ပြန့်နှံ့ခဲ့တာ ဖြစ်ပါတယ် 

မင်နာရာ၏ ထူးခြားမှု 

—————

ဗလီ၀တ်ကျောင်းတော်ရဲ့ နှစ်ပေါင်း ၆၀၀ ကျော် သက်တမ်းအတွင်း ဖျက်ဆီးခံရမှုနဲ့ အကြိမ်ကြိမ် ကြုံတွေ့ခဲ့ရပါတယ်။ 

ဗလီ၀တ်ကျောင်းတော်ရဲ့ အဓိက အဆောက်အဦး ပြာပုံအတိ ဖြစ်ခဲ့ပေမယ့် မင်နာရာ မျှော်စင်ကတော့ မပျက်မဆီး အကောင်းအတိုင်း ကျန်ရစ်နေခဲ့ပါတယ်။ 

၁၉၄၁ ခုနှစ် ဂျပန်တွေ ကျူးကျော်သိမ်းပိုက်မှုမှာ ဒီဗလီ၀တ်ကျောင်းတော် မီးရှို့ဖျက်ဆီးခံခဲ့ရပါတယ်။ ၁၉၆၀ ပြည့်နှစ်တွေမှာ ဗလီကို ပြန်ဆောက်ခဲ့ပြီး သိပ်မကြာခင်ကပဲ မွမ်းမံပြင်ဆင်မှုတွေ လုပ်ဆောင်ခဲ့ပါတယ်။ 

ဗလီရဲ့မင်နာရာဟာ ကံကောင်းစေတယ်လို့ ဒေသခံတွေက ယုံကြည်နေကြပါတယ်။ 

“ဒီဗလီကို ဖျက်ဆီးဖို့ အကြိမ်ကြိမ် ကြိုးစားခဲ့ကြတယ်လို့ သမိုင်းတွေမှာ ရေးပါတယ်။ မင်နာရာကိုတော့ ဖျက်ဆီးလို့ မရခဲ့ဘူး။ ဒါ့ကြောင့် ဒီမျှော်စင်မှာ အလ္လာဟ်အရှင်မြတ်ရဲ့ ကောင်းချီးတွေရှိတယ်လို့ ဒေသခံတစ်ချို့က ယုံကြည်ကြပြီး မျှော်စင်အစိတ်အပိုင်းတွေကို ကံကောင်းစေမယ့် အဆောင်အဖြစ် ယူဆောင်ကြတာတွေ ရှိပါတယ်” လို့ ပရော်ဖက်ဆာ ၀ါဒီက ပြောပါတယ်။ 

“ဒါ့ကြောင့် အစိုးရက မျှော်စင်ကို ပလက်စတစ်အကြည် သွန်းလောင်းခဲ့ပြီး လူတွေ ဖဲ့ယူလို့မရအောင် လုပ်ခဲ့ရပါတယ်”

သမိုင်းအမွေအနှစ် 

——————

၂၀၁၃ ခုနှစ်မှာ ဖိလစ်ပိုင်သမ္မတ အကွီနိုက ရှိခ် ကာရီမွလ် မက််ခ်ဒွမ် ဗလီ၀တ်ကျောင်းတော်ကို အမျိုးသား သမိုင်းအမွေအနှစ်အဖြစ် သတ်မှတ်ကြေငြာခဲ့ပါတယ်။ 

မင်ဒါနာအိုနဲ့ ဆူးလူးကျွန်းတို့ကို ရေလမ်းကနေ ရောက်လာပြီး အစ္စလာမ်သာသနာ ပြုခဲ့တဲ့ ထင်ရှားတဲ့ သာသာနာပြု ၇ ဦးထဲမှာ ရှိခ် မက်ခ်ဒွမ်လည်း ပါ၀င်ပါတယ်။ 

ဒီ ၇ ဦးစလုံးဟာ စွန်နီမွတ်စလင် ၀ိပဿနာဂိုဏ်းတစ်ခုဖြစ်တဲ့ နက်ရှ်ဘန်ဒီအဖွဲ့၀င်တွေ ဖြစ်ပါတယ်။ နက်ရှ်ဘန်ဒီ၀ါဒဟာ အလယ်အာရှမှာ ထွန်ကားခဲ့ပြီးနောက်ပိုင်းမှာ အိန္ဒိယတိုက်ငယ်အထိ ပြန့်နှံ့ခဲ့ပါတယ်။ 

“ဒီဗလီဟာ ဖိလစ်ပိုင်မှာ အစ္စလာမ်သာသနာ ပြန့်နှံ့တည်တံ့မှု အထောက်အထား ဖြစ်ပြီး ဖိလစ်ပိုင်ကို အရှေ့တောင်အာရှ၊  အစ္စလာမ်ကမ္ဘာက မွတ်စလင်တွေနဲ့ ချိတ်ဆက်ပေးထားပါတယ်” လို့ ဖိလစ်ပိုင်တက္ကသိုလ် အစ္စလာမ့်ရေးရာ လေ့လာမှုဌာန ပရော်ဖက်ဆာ ဒါ၀င် အဘ်ဆာရီက ပြောပါတယ်

ဗလီ၀တ်ကျောင်းတော် တည်ရှိရာ မင်ဒါနာအိုကျွန်း ဘန်ဆာမိုရို ကိုယ်ပိုင်အုပ်ချုပ်ခွင့်ရဒေသမှာ နို၀င်ဘာ ၇ ရက်နေ့ကို ရှိခ် ကာရီမွလ် မက်ခ်ဒွမ်နေ့အဖြစ် ရုံးပိတ်ရက် သတ်မှတ်ထားပါတယ်။ 

Ref: Arab News