လမ်းကြောင်းမှန်ပေါ် ရောက်လာပြီဖြစ်တဲ့ ဆော်ဒီ-အီရန် ဆက်ဆံရေး

သြဂုတ် ၁၈၊ ၂၀၂၃

M-Media 

-အရင်က ရန်ဖက်နိုင်ငံတွေဖြစ်တဲ့ ဆော်ဒီအာရေဗျနဲ့ အီရန်နိုင်ငံတို့ရဲ့ ဆက်ဆံရေးဟာ ခေတ်သစ်တစ်ခုကို ရောက်ရှိလာပြီဖြစ်ပါတယ်။ 

အီရန်နိုင်ငံခြားရေး၀န်ကြီး ဟိုစိန် အမီရ်အဘ်ဒိုလာဟင် မနေ့က ဆော်ဒီအာရေဗျကို ရောက်ရှိလာခဲ့ပြီး နှစ်နိုင်ငံ ရှေ့ဆက်ပူးပေါင်းဆောင်ရွက်မယ့်ကိစ္စတွေကို ဆွေးနွေးခဲ့ကြပါတယ်။ 

“အီရန်နဲ့ ဆော်ဒီတို့ရဲ့ ဆက်ဆံရေးဟာ လမ်းကြောင်းမှန်ပေါ် ရောက်ရှိလာခဲ့ပြီး တိုးတက်မှုတွေကိုလည်း တွေ့လာရပါပြီ” လို့ ဆော်ဒီနိုင်ငံခြားရေး၀န်ကြီး မင်းသား ဖိုက်ဆဲလ် ဘင် ဖာရ်ဟန်နဲ့ ပူးတွဲပြုလုပ်တဲ့ သတင်းစာရှင်းလင်းပွဲမှာ ဟိုစိန်က ပြောကြားခဲ့ပါတယ်။ 

မင်းသား ဖိုက်ဆဲလ်ဟာ ဇွန်လအတွင်းက အီရန်နိုင်ငံကို သွားရောက်ခဲ့ပါတယ်။ 

မနေ့က နိုင်ငံခြားရေး၀န်ကြီးနှစ်ဦးရဲ့ တွေ့ဆုံမှုမှာ နှစ်နိုင်ငံ ပူးပေါင်းဆောင်ရွက်ရေး ကိစ္စတော်တော်များများကို ဆွေးနွေးခဲ့ကြတယ်လို့ ဟိုစိန်က ဆိုပါတယ်။ 

မင်းသား ဖိုက်ဆဲလ်ကလည်း ဘုရင် ဆလ်မန်ရဲ့ ဖိတ်ကြားထားမှုနဲ့အတူ အီရန်သမ္မတ အီဘရာဟင် ရိုင်စီ လာရောက်လည်ပတ်ဖို့ မျှော်လင့်ကြောင်း ပြောကြားခဲ့ပါတယ်။ 

ဆော်ဒီနဲ့ အီရန်တို့ဟာ ၂၀၁၆ ခုနှစ်က စတင်ကာ သံအဆက်အသွယ် ပြတ်တောက်သွားခဲ့တာပါ။ ပြီးခဲ့တဲ့ နှစ်အနည်းငယ်အတွင်း ဆက်ဆံရေး ပြန်လည်တည်ဆောက်ဖို့ ကြိုးစားခဲ့ပြီး တရုတ်ရဲ့ ကြား၀င်ဆောင်ရွက်ပေးမှုနဲ့အတူ အခုနှစ်အစောပိုင်းမှာ သဘောတူညီချက်တစ်ခု ရရှိခဲ့ပါတယ်။ 

ဇွန်လတွင်းမှာတော့ နှစ်ဖက်သံရုံးတွေ အပြန်အလှန် ဖွင့်လှစ်ခဲ့ကြပါတယ်။ 

“အစ္စလာမ့် ညီအစ်ကိုစိတ်ဓာတ်၊ ဘုံအကျိုးစီးပွား ပူးပေါင်းဆောင်ရွက်မှုတို့နဲ့အတူ ကျွန်တော်တို့ရဲ့ ဆက်ဆံရေး ကဏ္ဍသစ်တစ်ခု ရောက်ရှိလာဖို့ မျှော်လင့်ထားပါတယ်” လို့ မင်းသား ဖိုက်ဆဲလ်က ပြောကြားခဲ့ပါတယ်။ 

Ref: Reuters