သြဂုတ် ၂၀၊ ၂၀၂၃
M-Media
![](http://www.m-mediagroup.com/wp-content/uploads/2023/08/Screenshot_2023-08-20-14-49-53-570_com.android.chrome-edit-1024x578.jpg)
-၂၀၀၆ ခုနှစ်က စစ်တပ်ရဲ့ အာဏာသိမ်း ဖြုတ်ချခြင်း ခံလိုက်ရတဲ့ ထိုင်း၀န်ကြီးချုပ်ဟောင်း သက်ဆင်ရှင်နာ၀ပ်ထရာဟာ သြဂုတ်လ ၂၂ ရက်နေ့မှာ ထိုင်းနိုင်ငံကို ပြန်လာမယ်လို့ သမီးဖြစ်သူက ပြောပါတယ်။
သက်ဆင်ဟာ အသက် ၇၄ နှစ် ရှိပြီဖြစ်ပြီး နိုင်ငံရပ်ခြားမှာ တိမ်းရှောင်နေရတာ ၁၅ နှစ်လောက် ရှိနေပါပြီ။
“ဘယ်သူ့ကိုမှ ထိခိုက်လိုစိတ် မရှိပါဘူး။ လူတိုင်း တစ်ယောက်နဲ့တစ်ယောက် ချစ်ခင်တာ၊ တိုင်းပြည် ငြိမ်းချမ်းနေတာကိုသာ ကျွန်တော် လိုချင်ပါတယ်။ ကျွန်တော် အသက်ကြီးပြီ။ မြေးမြစ်တွေကိုလည်း လွမ်းလှပါပြီ။ မိသားစုနဲ့ အတူ နေချင်ပါတယ်” လို့ သက်ဆင်က ဘီဘီစီ သတင်းဌာနကို ပြောကြားခဲ့ပါတယ်။
သြဂုတ်လ ၂၂ ရက်နေ့ဟာ ထိုင်းလွှတ်တော်က ၀န်ကြီးချုပ်သစ် ရွေးမယ့်နေ့လည်း ဖြစ်ပါတယ်။ သက်ဆင်သမီး ပေတွန်တန် ရှင်နာ၀ပ်ထရာ ဦးဆောင်တဲ့ Pheu Thai ပါတီက အမည်စာရင်းတင်ထားတဲ့ ဆရတ်သာ သာဗီစင် ၀န်ကြီးချုပ် ဖြစ်သင့်၊ မဖြစ်သင့် လွှတ်တော် ၂ ရပ်က မဲခွဲဆုံးဖြတ်မှာ ဖြစ်ပါတယ်။
မေလက ပြုလုပ်ခဲ့တဲ့ အထွေထွေရွေးကောက်ပွဲမှာ Move Forward ပါတီက မဲအများဆုံးရခဲ့ပြီး ပါတီခေါင်းဆောင် ပီတ ၀န်ကြီးချုပ်အဖြစ် အမည်စာရင်းတင်သွင်းခဲ့ပေမယ့် လွှတ်တော်က နှစ်ကြိမ်တိုင်တိုင် ပယ်ချယ်ခဲ့ပါတယ်။
Pheu Thai ပါတီဟာ ဒုတိယမဲအများဆုံးရတဲ့ ပါတီဖြစ်ပြီး ပါတီကတင်သွင်းတဲ့ ၀န်ကြီးချုပ်လောင်းကို လွှတ်တော်က အတည်ပြုရင် အစိုးရဖွဲ့ခွင့် ရရှိမှာ ဖြစ်ပါတယ်။
သက်ဆင်ဟာ ၂၀၀၆ ဖြုတ်ချခံရပြီးနောက်ပိုင်း ရာဇ၀တ်မှု ၄ ခုနဲ့ စွဲချက်တင်ခံထားရပြီး ၃ မှုအတွက် ထောင်ဒဏ် ၁၀ နှစ် ချမှတ်ခံထားရပါတယ်။
ပြည်တော်ပြန်လာတဲ့အချိန် သက်ဆင်တစ်ယောက် ဖမ်းဆီးခံရနိုင်တယ်လို့ ကျွမ်းကျင်သူတွေက သုံးသပ်ပါတယ်။ သက်ဆင်ကတော့ သူ့ကို စွဲဆိုထားမှုတွေအတွက် ရင်ဆိုင်သွားမယ်လို့ မေလက ပြောကြားထားပါတယ်။
Ref : CNA
Comments