ပူတင်နဲ့ ကင်ဂျုံအွန် အကြီးအကျယ် ပူးပေါင်းတော့မလား

စက်တင်ဘာ ၅၊ ၂၀၂၃

• 

• 

M-Media 

– မြောက်ကိုရီးယားခေါင်းဆောင် ကင်ဂျုံအွန်ဟာ အခုလအတွင်း ရုရှားကို သွားရောက်ကာ သမ္မတပူတင်နဲ့ တွေ့ဆုံဖို့ ရှိနေပါတယ်။ 

ယူကရိန်းကို ရုရှားရဲ့ ကျူးကျော်စစ်မှာ မြောက်ကိုရီးယားက လက်နက်ထောက်ပံ့နိုင်ရေး ဆွေးနွေးသွားကြမယ်လို့ အမေရိကန် တာ၀န်ရှိသူတစ်ဦးက ပြောပါတယ်။ 

ဘယ်နေ့သွားမလဲ၊ ဘယ်နေရာမှာ တွေ့ဆုံကြမလဲဆိုတာ အတိအကျ မသိရပါဘူး။ ရုရှားနဲ့ မြောက်ကိုရီးယားတို့ကလည်း ဒီကိစ္စကို ထုတ်မပြောပါဘူး။ 

New York Times သတင်းဌာနက ကင်ဂျုံအွန်ဟာ ကျည်ကာရထားနဲ့ သွားရောက်မယ်လို့ နီးစပ်တဲ့ သတင်းရင်းမြစ်တွေကို ကိုးကားပြီး ဖော်ပြပါတယ်။ 

ရုရှားနဲ့ မြောက်ကိုရီးယားတို့ဟာ လက်နက်ကိစ္စနဲ့ အကြီးအကျယ် ပူးပေါင်းဆောင်ရွက်ဖို့ စီစဥ်နေကြတယ်လို့ အမေရိကန်က ထုတ်ပြောပြီးနောက်ပိုင်း အခုသတင်း ထွက်ပေါ်လာတာပါ။ 

မကြသေးခင်က မြောက်ကိုရီးယားကို သွားရောက်ခဲ့တဲ့ ရုရှားကာကွယ်ရေး၀န်ကြီးဟာ အ၀ေးပစ် လက်နက်ကြီးတွေ ထုတ်ရောင်းဖို့ ကင်ဂျုံအွန်ကို စည်ရုံးခဲ့တယ်လို့ အမေရိကန် နိုင်ငံတော်လုံခြုံရေးကောင်စီ တာ၀န်ရှိသူ ဂျွန် ကီရ်ဘီက ထုတ်ပြောထားပါတယ်။ 

ပူတင်နဲ့ ကင်ဂျုံအွန်တို့ဟာ စစ်ဖက် ပူးပေါင်းဆောင်ရွက်မှုတွေ တိုးမြှင့်လုပ်ဆောင်ဖို့ သဘောတူထားကြတယ်လို့လည်း ကီရ်ဘီက ပြောပါတယ်။ 

အမေရိကန်ကတော့ မြောက်ကိုရီးယားနဲ့ ရုရှား နှစ်နိုင်ငံစလုံးကို ပိတ်ဆို့အရေးယူမှုတွေ ထပ်တိုးလုပ်ဆောင်ဖို့ ရှိနေပါတယ်။ 

Ref: CNN 

ပုံ ၁ – ပူတင်နှင့် ကင်ဂျုံအွန်

ပုံ ၂- ရုရှားကာကွယ်ရေး၀န်ကြီးကို လက်နက်များ ပြသနေသည့် ကင်ဂျုံအွန်