အံ့သြဖွယ် ပျောက်ဆုံးနေသည့် အမေရိကန်၏ F-35 တိုက်လေယာဥ်

စက်တင်ဘာ ၁၉၊ ၂၀၂၃

M-Media 

-အမေရိကန်ပြည်ထောင်စု တောင်ကယ်ရိုလိုင်းနားမှာ နောက်ဆုံးပေါ် F-35B Lightning II တိုက်လေယာဥ်တစ်စင်း တနင်္ဂနွေနေ့က ပျောက်ဆုံးသွားပြီး ရှာဖွေမှုတွေ လုပ်ဆောင်နေပါတယ်။ 

မောင်းနှင်သွားတဲ့ လေယာဥ်မှုးက လေပေါ်မှာ အရေးပေါ် ခုန်ထွက်ခဲ့ပြီးနောက်ပိုင်း လေယာဥ် ပျောက်ဆုံးသွားတာပါ။ ဘာ့ကြောင့် အရေးပေါ် ခုန်ထွက်ရသလဲဆိုတာ ထုတ်ပြန်ခြင်း မပြုပါဘူး။ 

F-35 လေယာဥ်တစ်စီးဟာ အနည်းဆုံး ဒေါ်လာ သန်း ၈၀ တန်ဖိုးရှိပြီး အဓိက အားသာချက်က ကိုယ်ပျောက်နိုင်တာပါ။ ဘယ်ရေဒါနဲ့မှ ဖမ်းလို့ မရပါဘူး။ 

လက်ရှိမှာ အမေရိကန် စစ်ဖက်၊ အရပ်ဖက် အဖွဲ့ပေါင်းစုံက ရှာဖွေမှုတွေ လုပ်ဆောင်နေပြီး၊ အများပြည်သူကိုလည်း တွေ့ရင် အကြောင်းကြားဖို့ မေတ္တာရပ်ခံထားပါတယ်။ 

လေယာဥ်ပျောက်ဆုံးရာ နော့သ် ချာလ်စတန်ဒေသ လွှတ်တော်အမတ် နန်စီ မေ့စ်က နောက်ဆုံးပေါ် ခြေရာခံကိရိယာတွေ တပ်ဆင်ထားတဲ့ လေယာဥ်ကို ရှာမတွေ့ဘူးဆိုတဲ့အတွက် အစိုးရနဲ့ စစ်တပ်ကို ဆိုရှယ်မီဒီယာကနေ ၀ေဖန်ခဲ့ပါတယ်။ 

“F-35 ကို ဘယ်လိုတောင် ဖျောက်လိုက်ကြတာလဲ။ တပ်ထားတဲ့ခြေရာခံ ကိရိယာတွေက ဘာလုပ်ဖို့လဲ။ ပြည်သူတွေကို ရှာပြီး၊ ပြန်အပ်ပေးပါလို့ ပြောနေရပြီလား”

Ref: Reuters