မဏိပူရက လူမျိုးရေးအဓိကရုဏ်း ချုပ်ငြိမ်းအောင် ကြိုးပမ်းနေကြသည့် မွတ်စလင်များ

အောက်တိုဘာ ၂၊ ၂၀၂၃
M-Media

-မဏိပူရမှာ ဟိန္ဒူလူမျိုးစု ကသည်းတွေနဲ့ ခရစ်ယာန်လူမျိုးစု ကူကီးတို့အကြား ဖြစ်ပွားနေတဲ့ လူမျိုးရေး အဓိကရုဏ်း ပြေလည်စေဖို့အတွက် မွတ်စလင်လူ့အဖွဲ့အစည်းက ကြိုးပမ်းပေးနေပါတယ်။

မဏိပူရက အစ္စလာမ်ဘာသာ၀င်ကို ပန်ဂါလ်လို့ ခေါ်ပါတယ်။

ကသည်းတွေနဲ့ ကူကီးတွေရဲ့ လူမျိုးရေးအဓိကရုဏ်းဟာ မေလကတည်းက စတင်ခဲ့တာပါ။ လက်ရှိမှာ အဲဒီ လူ့အဖွဲ့အစည်းနှစ်ခုဟာ ပြည်နယ်အတွင်း သီးခြားစီဖြစ်သွားပြီး တစ်ဖက်နဲ့တစ်ဖက် ရန်စောင်နေကြပါတယ်။

ပန်ဂါလ်မွတစ်လင်တွေက ဒီအဓိကရုဏ်း အမြန်ချုပ်ငြိမ်းအောင် တတ်နိုင်သမျှ ဆောင်ရွက်နေကြပါတယ်။ အထူးသဖြင့် တိုက်ခိုက်မှုတွေကြောင့် အိုးအိမ်စွန့်ခွာ ထွက်ပြေးရတဲ့ ဒုက္ခသည်တွေကို ခေါ်ယူ စောင့်ရှောက်ကျွေးမွေးပြုစုထားတာမျိုး ဖြစ်ပါတယ်။

မငြိမ်သက်မှု အကြီးအကျယ်ဖြစ်ခဲ့တဲ့ မေလအစောပိုင်းမှာ ကူကီးလူမျိုး ၃ ထောင်လောက်ဟာ ပြည်နယ်မြို့တော် အင်ဖာက မွတ်စလင်ရပ်ကွက်ထဲ ပြေး၀င်ခိုလှုံခဲ့ရပါတယ်။ ပန်ဂါလ်မွတ်စလင်တွေက ကူကီးတွေကို နေရာထိုင်ခင်း ပေးခဲ့ပြီး၊ ချက်ပြုတ်ကျွေးမွေးခဲ့ကြပါတယ်။

နောက်ပိုင်းမှာ လုံခြုံရေးတပ်ဖွဲ့တွေကို ခေါ်ယူပြီး ကူကီးတွေကိုအပ်ကာ ဘေးလွတ်ရာကို ပြောင်းရွှေ့ပေးခဲ့ပါတယ်။

ကသည်းနဲ့ ကူကီးတွေ အတွေ့ခံလို့မရတဲ့ လက်ရှိအခြေအနေမှာ မွတ်စလင်တွေက နှစ်ဖက်လူ့အဖွဲ့အစည်းကြား ပေါင်းကူးပေးသူတွေ ဖြစ်လာပါတယ်။

ကသည်းရပ်ကွက် ကူကီးမ၀င်ရ၊ ကူကီးရပ်ကွက် ကသည်းမ၀င်ရလို့ ရန်ငါ စည်းခြားထားပေမယ့် နှစ်ဖက်စလုံးက မွတ်စလင်တွေကို ယုံယုံကြည်ကြည်နဲ့ ဆက်ဆံကြပါတယ်။

“လက်ရှိတိုက်ခိုက်မှုတွေမှာ ကျွန်တော်တို့က ဘယ်ဘက်မှ မပါဘူး။ အဲဒီ လူမျိုး ၂ မျိုးစလုံးက ကျွန်တော်တို့ ရန်သူတွေမှမဟုတ်ဘဲ။ ဒါ့ကြောင့် နှစ်ဖက်စလုံးကို ကျွန်တော်တို့ သွားလာလို့ ရပါတယ်” လို့ ပန်ဂါလ်မွတ်စလင် တက္ကဆီယာဥ်မောင်းတစ်ယောက်က ပြောပါတယ်။

လူများစု ဟိန္ဒူဘာသာ၀င် ကသည်းလူမျိုးတွေက မဏိပူရဌာနေ ကူကီးလူမျိုးတွေလို သီးခြားအခွင့်အရေး တောင်းရာကနေ လူမျိုးရေး အဓိကရုဏ်း စတင်ခဲ့တာဖြစ်ပါတယ်။ ကသည်းတွေသာ သီးခြားအခွင့်အရေး ရသွားရင် သူတို့ရဲ့ ဖြစ်တည်မှု ပျောက်ဆုံးသွားမှာကို ကူကီးတွေက ကြောက်ရွံ့နေကြတာပါ။

ရန်စောင်နေကြတဲ့ နှစ်ဖက်အသိုင်းအ၀ိုင်းကို ကူညီရတဲ့ မွတ်စလင်တွေရဲ့ အနေအထားကလည်း မလွယ်ပါဘူး။ စိတ်သဘောထားပြင်းထန်တဲ့ ကူကီးနဲ့ ကသည်းအချို့ရဲ့ ရန်လိုမှုနဲ့လည်း ကြုံတွေ့ရပါတယ်။

မဏိပူရမွတ်စလင်တွေကတော့ သူ့တို့ရဲ့ ရပ်တည်ချက်အတိုင်း နှစ်ဖက်လူ့အဖွဲ့အစည်းကြား ပေါင်းကူးတံတားအဖြစ် ဆက်လက်ဆောင်ရွက်နေဆဲ ဖြစ်ပါတယ်။

Ref: Siasat

(ဓာတ်ပုံ – အင်ဖာမြို့မှ ဆာဒါ ဘဇားရ် ဂျာမေဗလီ)