ဂါဇာမတည်မငြိမ်ဖြစ်ချိန် အနောက်ဖက်ကမ်းမှာ မြေခိုးနေတဲ့ ဂျူးအခြေချနေထိုင်သူများ

အောက်တိုဘာ ၂၀၊ ၂၀၂၃

M-Media 

• 

• 

-အစ္စရေးက ဂါဇာကမ်းမြှောင်မှာ တိုက်ခိုက်မှု အကြီးအကျယ်လုပ်နေတဲ့အချိန် အနောက်ဖက်ကမ်းမှာလည်း ဂျူးအခြေချနေထိုင်သူတွေက ပါလက်စတိုင်းတွေရဲ့ နယ်မြေတွေကို အကြမ်းဖက်သိမ်းယူနေတယ်လို့ သိရပါတယ်။ 

အနောက်ဖက်ကမ်းက ဘဒူအင်လူမျိုးစု ရွာတွေထဲက တစ်ခုဖြစ်တဲ့ ၀ါဒီ အလ်-ဆစ်က ရွာသားတွေအာလုံးဟာ အောက်တိုဘာ ၁၂ ရက်နေ့မှာ ဘေးလွတ်ရာကို ထွက်ပြေးခဲ့ရပါတယ်။ 

အနီးအနားက အစ္စရေးရဲ့ တရားမ၀င် အခြေချအိမ်ယာမှာ နေထိုင်သူတဲ့ ဂျူးလူအုပ်က လက်နက်တွေနဲ့ လာရောက်ပြီး ရွာကို ဖျက်ဆီးခဲ့ကြလို့ ဖြစ်ပါတယ်။ 

၀ါဒီအလ်-ဆစ်ရွာကို သိမ်းဖို့နဲ့ တွေ့သမျှလူတွေကို သဖြတ်ဖို့အတွက် ဂျူးအခြေချနေထိုင်သူတွေဟာ ရက်အတော်ကြာ ဆော်သြ လူစုခဲ့ကြတာပါ။ အဲဒီလူအုပ်ကို အစ္စရေး အရန်စစ်သားတွေက ဦးဆောင်တာ ဖြစ်ပါတယ်။ 

ဘဒူအင်လူမျိုးတွေ မနေနိုင်အောင် ဂျူးလူအုပ်က နေ့စဥ်နဲ့အမျှ တိုက်ခိုက်ခဲ့ပြီး အောက်တိုဘာ ၁၂ ရက်နေ့မှာတော့ အပြီးသိမ်းယူကာ ရွာက နေအိမ်အဆောက်အဦးတွေအားလုံးကို ဖြိုချဖျက်ဆီးခဲ့ပါတယ်။ 

ဟစ်တလာရန်ကြောင့် ထွက်ပြေးလာရတဲ့ အရှေ့ဥရောပက ဂျူးတွေဟာ လက်နက်ကိုင်အဖွဲ့ဖွဲ့ပြီး ပါလက်စတိုင်းတွေကို သတ်ဖြတ်မောင်းထုတ်ကာ ၁၉၄၈ ခုနှစ်မှာ အစ္စရေးနိုင်ငံကို ထူထောင်ခဲ့ကြတာပါ။ 

အဲဒီနောက်ပိုင်း အစ္စရေးအစိုးရနဲ့ လက်နက်ကိုင်အဖွဲ့က ပါလက်စတိုင်းမြေတွေကို ကျူးကျော်သိမ်းပိုက်ခဲ့သလို၊ ဂျူးလူအုပ်ကလည်း နည်းလမ်းမျိုးစုံနဲ့ နယ်မြေတွေ၊ နေအိမ်တွေကို လုယက်ယူငင်နေကြတာဖြစ်ပါတယ်။ 

ဂါဇာမှာ တိုက်ခိုက်မှု ဖြစ်ပြီးနောက်ပိုင်း ဒီလုယက်မှုဟာ ပိုဆိုးလာပါတယ်။ 

“အနောက်ဖက်ကမ်းတစ်ခုလုံးမှာ ဖြစ်နေတာဗျ။ အခြေအနေကို အခွင့်ကောင်းယူပြီး ထင်ရာစိုင်းနေကြတာ” လို့ အစ္စရေး ငြိမ်းချမ်းရေးလှုပ်ရှားသူ ဂိုင် ဟီရ်ရှဖလ်က ပြောပါတယ်။ 

အနောက်ဖက်ကမ်း ရာမာလာမြို့ အရှေ့ပိုင်းက ပါလက်စတိုင်းရွာတွေဆိုရင် ကုန်သလောက်ရှိနေပါပြီ။ 

အောက်တိုဘာ ၇ ရက်နေ့နောက်ပိုင်း အနောက်ဖက်ကမ်းက ရပ်ကွက် ၁၃ ခုလောက်ဟာ ဂျူးအခြေချ နေထိုင်သူတွေရဲ့ ခိုးယူ သိမ်းပိုက်ခြင်းကို ခံလိုက်ရပါတယ်။ 

ဂျူးအစွန်းရောက် အီတာမာ ဘင် ဂါဗီရ် လုံခြုံရေး၀န်ကြီး ဖြစ်လာပြီးနောက်ပိုင်း အစ္စရေးအစိုးရဟာ အရပ်သားတွေကို လက်နက်တွေ ပိုမိုထုတ်ပေးလာတာကြောင့်၊ ပါလက်စတိုင်းပိုင်နက်က ဂျူးအခြေချနေထိုင်သူတွေဟာ လက်နက်တောင့်တင်းကာ ခြိမ်းခြောက် တိုက်ခိုက်မှုတွေ ပိုမို လုပ်ဆောင်လာကြတာ ဖြစ်ပါတယ်။ 

Ref: Aljazeera