ဂါဇာသတ်ဖြတ်မှုအတွက် အစ္စရေးနှင့် တူရကီတို့အကြား တင်းမာမှု မြင့်တက်

အောက်တိုဘာ ၂၉၊ ၂၀၂၃

M-Media 

-ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးရဲ့ အကြမ်းဖက် သတ်ဖြတ်မှုတွေအတွက် တူရကီက ၀ေဖန်တာကြောင့် နှစ်နိုင်ငံအကြား တင်းမာမှုတွေ မြင့်တက်လာပါတယ်။ 

ပြီးခဲ့ရက်တွေအတွင်း တူရကီသမ္မတ အာဒိုဂန်ဟာ အစ္စရေးရဲ့ ကျူးကျော်သတ်ဖြတ်မှုကို ပြင်းပြင်းထန်ထန် ၀ေဖန်ပြောဆိုခဲ့ပြီး၊ ဟားမက်စ်ဟာ အကြမ်းဖက်အဖွဲ့အစည်းမဟုတ်ဘဲ လွတ်မြောက်ရေးအတွက် လှုပ်ရှားနေတဲ့ တော်လှန်ရေးအဖွဲ့သာ ဖြစ်တယ်ဆိုပြီး အကြိမ်ကြိမ် ပြောဆိုခဲ့ပါတယ်။ 

အစ္စရေးနဲ့ ဘာအပေးအယူမှ မရှိတဲ့အတွက် အစ္စရေးရဲ့ လုပ်ရပ်တွေကို တူရကီက ကာကွယ်ပေးစရာ အကြောင်းမရှိဘူးလို့လည်း အာဒိုဂန်က ထည့်သွင်းပြောဆိုခဲ့ပါတယ်။ 

အစ္စရေးက အာဒိုဂန်ဟာ ဂျူးဆန့်ကျင်ရေး၀ါဒီဖြစ်တယ်လို့ ပြောဆိုခဲ့ပြီး တူရကီက သံအမတ်ကိုပြန်ခေါ်ကာ ဆက်ဆံရေး ပြန်လည်သုံးသပ်သွားမယ်လို့ ထုတ်ပြန်ပါတယ်။ 

တူရကီနိုင်ငံခြားရေး၀န်ကြီးဌာနကလည်း ဒီပြောဆိုချက်ကို တုန့်ပြန်ပါတယ်။ 

အစ္စရေးဟာ တစ်ကမ္ဘာလုံးရှေ့မှာ လူသားထုအပေါ် ကျူးလွန်တဲ့ ရာဇ၀တ်မှုတွေကို ပြောင်ပြောင်တင်းတင်း လုပ်ဆောင်နေတာတောင် ၀ေဖန်ရှုတ်ချမခံနိုင်ဘူးလို့ ထုတ်ပြန်ပါတယ်။ 

အာဒိုဂန်ဟာ ဂျူးဆန့်ကျင်ရေး၀ါဒီဆိုတဲ့ အစ္စရေးရဲ့ပြောကြားမှုတွေက အခြေအမြစ်မရှိဘဲ၊ တူရကီဟာ ဂျူးလူမျိုးတွေကို အကာအကွယ်ပေးရာ နေရာတစ်ခုအဖြစ် အခုအချိန်အထိ ရှိနေတယ်လို့ ကြေငြာချက်မှာ ဖော်ပြထားပါတယ်။ 

Ref: Aljazeera