လူနာတင်ယာဥ်တန်းကို ဒုံးကျည်နဲ့ပစ်ကာ စစ်ရာဇ၀တ်မှု ထပ်ကျူးလွန်လိုက်တဲ့ အစ္စရေး

နို၀င်ဘာ ၄၊ ၂၀၂၃

M-Media 

-ဂါဇာကမ်းမြှောင် အလ်ရှီဖာ ဆေးရုံအနီးမှာ လူနာတင်ယာဥ်တန်းကို အစ္စရေးက ဒုံးကျည်နဲ့ ပစ်ခတ်ခဲ့တာကြောင့် ၁၅ ဦးသေဆုံးကာ ၆၀ လောက် ဒဏ်ရာရရှိခဲ့တယ်လို့ သိရပါတယ်။ 

တိုက်ခိိုက်မှုဟာ သောကြာနေ့မှာ ဖြစ်ပွားခဲ့တာပါ။ အစ္စရေးရဲ့ တိုက်ခိုက်မှုကြောင့် ဆိုးဆိုးရွားရွား ဒဏ်ရာရနေတဲ့သူတွေ အီဂျစ်မှာ ဆေးကုဖို့ အလ်ရှီဖာ ဆေးရုံကနေ ရာဖာနယ်ခြားကို သွားပို့မယ့် လူနာတင်ကား ယာဥ်တန်းကို အစ္စရေးက ပစ်မှတ်ထားခဲ့တာဖြစ်ပါတယ်။ 

ကြက်ခြေနီ၊ လခြမ်းနီအဖွဲ့နဲ့ ကမ္ဘာကြီးကို အသိပေးလိုတာက လူနာတင်ယာဥ်တန်း တိုက်ခိုက်မှုကြောင့် သေဆုံးဒဏ်ရာရသူတွေဟာ လူနာတင်ယာဥ်မှာ တန်းစီထိုင်နေကြသူတွေပါ။ ဒီယာဥ်တန်းဟာ ဆေးဖက်ဆိုင်ရာယာဥ်တန်းဖြစ်ပါတယ် လို့ ပါလက်စတိုင်း ကျန်းမာရေး၀န်ကြီးဌာန ပြောရေးဆိုခွင့်ရှိသူ အက်ရှ်ရက်ဖ် အလ်ကွဒ်ရာက ပြောပါတယ်။

ပါလက်စတိုင်း လခြမ်းနီအဖွဲ့ကလည်း အစ္စရေးရဲ့ ဒီတိုက်ခိုက်မှုကို ရှုတ်ချခဲ့ပါတယ်။

တိုက်ခိုက်မှုကြောင့် သေဆုံးဒဏ်ရာရသူ အများစုဟာ အမျိုးသမီးနဲ့ ကလေးငယ်တွေဖြစ်ပါတယ်။ 

ကမ္ဘာ့ကျန်းမာရေးအဖွဲ့ WHO အကြီအကဲ တက်ဒရို အဒ်ဟာနွမ်က ဒဏ်ရာရသူတွေကို ကယ်ထုတ်တဲ့ လူနာတင်ယာဥ်တန်းကို တိုက်ခိုက်တယ်ဆိုတဲ့သတင်းကြောင့် အလွန်အမင်း တုန်လှုပ်မိတယ်လို့ ပြောကြားခဲ့ပါတယ်။

လူနာတွေ၊ ကျန်းမာရေး၀န်ထမ်းတွေ၊ ကျန်းမာရေးအဆောက်အအုံတွေ၊ ဆေးရုံကားတွေကို ဘယ်လိုအခြေအနေမျိုးမှာပဲဖြစ်ဖြစ် ကာကွယ်ပေးရမယ်ဆိုတာ ထပ်လောင်းပြောကြားလိုပါတယ် 

အလ်ရှီဖာဆေးရုံဟာ သတ်မှတ်ပမာဏထပ်ပိုပြီး လူနာတွေကို လက်ခံကုသပေးနေရတဲ့ ဆေးရုံပါ။ အစ္စရေးရဲ့ တိုက်ခိုက်မှုကြောင့် ထွက်ပြေးလာရတဲ့ စစ်ရှောင်တွေကိုလည်း ဆေးရုံမှာ လက်ခံထားရပါတယ်။ 

အစ္စရေးက ပစ်မှတ်ထားတိုက်ခိုက်မှုတွေ၊ လောင်စာမရှိမှုတွေကြောင့် ဂါဇာက ဆေးရုံ ၁၆ ခု မလည်ပတ်နိုင်တော့ဘူးလို့ WHO က ပြောပါတယ်။

အောက်တိုဘာ ၇ ရက်နေ့က စတင်ခဲ့တဲ့ အစ္စရေးရဲ့ တိုက်ခိုက်မှုတွေကြောင့် သေဆုံးသူ ပါလက်စတိုင်း အရေအတွက်ဟာ ၉၂၀၀ ကျော်လာခဲ့ပြီး ဒဏ်ရာရသူက ၃၂၀၀၀ ကျော် ရှိနေပါတယ်။ 

Ref: Aljazeera