ကုလပြဌာန်းချက်အမှတ် ၉၉ ကိုအသုံးပြုပြီး အစ္စရေး၏ တိုက်ခိုက်သတ်ဖြတ်မှုကို တားဆီးရန် ဂူတာရက်စ်ကြိုးစား

ဒီဇင်ဘာ ၇၊ ၂၀၂၃

M-Media 

-ပါလက်စတိုင်းနိုင်ငံ ဂါဇာကမ်းမြှောင်မှာ အစ္စရေးရဲ့ တိုက်ခိုက်သတ်ဖြတ်မှုတွေကို တားဆီးနိုင်ဖို့အတွက် ကုလသမဂ္ဂရဲ့ ပြဌာန်းချက် ၉၉ ကို ကျင့်သုံးကြောင်း အထွေထွေအတွင်းရေးမှူး အန်တိုနီယို ဂူတာရက်စ်က ဗုဒ္ဓဟူးနေ့မှာ ကြေငြာလိုက်ပါတယ်။ 

နိုင်ငံတကာ ငြိမ်းချမ်းရေးနဲ့လုံခြုံရေး ထိခိုက်နိုင်ချေရှိတဲ့ အခြေအနေမျိုးတွေကို လုံခြုံရေးကောင်စီက ထိထိရောက်ရောက် တားဆီးဆောင်ရွက်ဖို့အတွက် ကုလအတွင်းရေးမှူးချုပ်က ပြဌာန်းချက် ၉၉ ကို အသုံးပြုပြီး ညွှန်ကြားနိုင်တာဖြစ်ပါတယ်။ 

သိမ်းပိုက်ခံထားရတဲ့ ပါလက်စတိုင်းပိုင်နက်တွေမှာ အစ္စရေးက လုပ်ဆောင်နေတဲ့ ကိစ္စတွေဟာ နိုင်ငံတကာ ငြိမ်းချမ်းရေးနဲ့ လုံခြုံရေးအပေါ် ခြိမ်းခြောက်မှုတွေ တိုးလာစေတဲ့အတွက် ပြဌာန်းချက် ၉၉ ကို အသက်သွင်းလိုက်ကြောင်း လုံခြုံရေးကောင်စီဥက္ကဌကို ပေးပို့တဲ့စာမှာ ဂူတာရက်စ်က ဖော်ပြထားပါတယ်။ 

တိုက်ခိုက်မှုတွေကြောင့် လူသားတွေခံစားနေရမှု၊ အခြေခံအဆောက်အဦးတွေ အကြီးအကျယ် ဖျက်ဆီးခံရမှု၊ အစ္စရေးနဲ့ ပါလက်စတိုင်းပြည်သူတွေ စိတ်ဒဏ်ရာရရှိမှုတွေကိုလည်း ဂူတာရက်စ်က စာထဲမှာ ဖော်ပြထားပါတယ်။ 

ညွှန်ကြားချက် ၉၉ ကို အသက်သွင်းလိုက်တာကြောင့် လုံခြုံရေးကောင်စီဟာ ဂါဇာကမ်းမြှောင်က အခြေအနေတွေ ငြိမ်သက်ရေး ဆွေးနွေး ဆောင်ရွက်ရတော့မှာဖြစ်ပါတယ်။ 

အဖွဲ့၀င်နိုင်ငံအားလုံးက ကြား၀င်ဖို့ သဘောတူခဲ့ရင် ပိတ်ဆို့အရေးယူမှုတွေလုပ်ဖို့၊ နောက်ဆုံးအဆင့် နိုင်ငံတကာတပ်တွေ ချထားဖို့အထိ လုပ်ဆောင်နိုင်မှာဖြစ်ပါတယ်။ 

ဒါပေမယ့် ဗီတိုအာဏာရှိတဲ့ အဖွဲ့၀င်နိုင်ငံ ၅ ခုက ကောင်စီရဲ့ ဘယ်လိုဆုံးဖြတ်ချက်မျိုးကိုမဆို ပယ်ချခွင့် ရှိနေပါတယ်။ 

ကုလသမဂ္ဂအတွင်းရေးမှူးချုပ်က ပြဌာန်းချက် ၉၉ ကို အသုံးပြုတာဟာ ကုလသမိုင်းမှာ ကြုံတောင့်ကြုံခဲ အခြေအနေမျိုးလည်း ဖြစ်ပါတယ်။ 

Ref: Aljazeera