အစ္စရေး၏ သတ်ဖြတ်မှုများကို တားဆီးရန် နိုင်ငံတကာတပ်လိုပြီဟု ကုလတာ၀န်ရှိသူပြော

ဒီဇင်ဘာ ၁၆၊ ၂၀၂၃

M-Media 

-အစ္စရေးက မတရားသိမ်းပိုက်ထားတဲ့ ပါလက်စတိုင်းပိုင်နက်တွေမှာ နိုင်ငံတကာ ကုလကာကွယ်ရေးတပ်တွေ ချထားဖို့အတွက် ပါလက်စတိုင်းပိုင်နက်ဆိုင်ရာ ကုလအထူးကိုယ်စားလှယ် ဖရန်စက်စကာ အလ်ဘန်နီစ်က တိုက်တွန်းဆော်သြလိုက်ပါတယ်။ 

နာဇီရန်ကြောင့် အရှေ့ဥရောပကနေ ထွက်ပြေးလာတဲ့ ဂျူးတွေဟာ လက်နက်ကိုင်အဖွဲ့တွေ ဖွဲ့ပြီး ပါလက်စတိုင်းတွေကို သတ်ဖြတ်မောင်းထုတ်ကာ ၁၉၄၈ ခုနှစ်မှာ အစ္စရေးနိုင်ငံအဖြစ် ထူထောင်ခဲ့တာဖြစ်ပါတယ်။ 

အဲဒီနောက်ပိုင်း ပါလက်စတိုင်းတွေအပေါ် နိုင်ငံသစ်အစ္စရေးက နည်းမျိုးနဲ့ ဖိနှိပ်သတ်ဖြတ်ခဲ့ပါတယ်။ 

ပါလက်စတိုင်းတော်လှန်ရေးအဖွဲ့ ဟားမက်စ်ရဲ့တိုက်ခိုက်မှုကို တုန့်ပြန်တယ်ဆိုတဲ့ခေါင်းစဥ်နဲ့ အောက်တိုဘာ ၇ ရက်နေ့က ဂါဇာမှာစတင်တဲ့ အစ္စရေးရဲ့ တိုက်ခိုက်မှုမှာလည်း ပြည်သူတွေကို အဓိက ပစ်မှတ်ထားခဲ့တာဖြစ်ပြီး သတ်ဖြတ်ခံရသူ ၁၉၀၀၀ နီးပါး ရှိလာပါပြီ။ 

အစ္စရေးက ၅၆ နှစ်ကြာ စစ်တပ်နဲ့ ကျူးကျော်သိမ်းပိုက်ထားတဲ့ ပါလက်စတိုင်းပိုင်နက်တွေမှာ ငြိမ်းချမ်းရေးရရှိဖို့အတွက် ကာကွယ်ရေးတပ်ဖွဲ့တွေ ချထားရမယ်လို့ အထူးကိုယ်စားလှယ် အလ်ဘန်နီစ်က မနေ့က ဆိုရှယ်မီဒီယာပို့စ်မှာ ကုလအတွင်းရေးမှူး အန်တိုနီယိုဂူတာရက်စ်ကို တိုက်တွန်းခဲ့ပါတယ်။ 

ဒီလိုဆောင်ရွက်ဖို့ ဂူးတာရက်စ်က ၂၀၁၈ ခုနှစ်မှာ အဆိုပြုခဲ့ပေမယ့် မအောင်မြင်ခဲ့ပါဘူး။ အလ်ဘန်နီစ်က အခုတစ်ကြိမ် ထပ်မံဆောင်ရွက်ဖို့ အလေးအနက်ထား တိုက်တွန်းတယ်လို့ ထည့်သွင်းရေးသားခဲ့ပါတယ်။ 

၂၀၁၈ ခုနှစ် အဆိုပြုချက်မှာ အချက်လေးချက် ပါ၀င်ပါတယ်။ 

ပါလက်စတိုင်းပိုင်နက်မှာ ခိုင်မာတောင့်တင်းတဲ့ ကုလအဖွဲ့ ထားရှိရေး၊ လူ့အခွင့်အရေးစောင့်ကြည့်သူတွေ၊ နိုင်ငံရေးတာ၀န်ရှိသူတွေ ချထားရေး၊ အစ္စရေးရဲ့ တရားမ၀င်အိမ်ယာတွေ၊ စစ်ဆေးရေးဂိတ်တွေမှာ ကုလစောင့်ကြည့်သူတွေ ချထားရေး၊ ပါလက်စတိုင်းအရပ်သားတွေကို ကာကွယ်ပေးနိုင်ရေးအတွက် ကုလငြိမ်းချမ်းရေးတပ် ဒါမှမဟုတ် ကုလရဲတပ်ဖွဲ့ ထားရှိရေးတွေဖြစ်ပါတယ်။ 

Ref: Aljazeera