ပါလက်စတိုင်းတွေရဲ့ လွတ်မြောက်ရေးမှာ တစ်ထောင့်တစ်နေရာက ပါ၀င်နိုင်ခဲ့ပါပြီ

ဇန်န၀ါရီ ၁၄၊ ၂၀၂၄

M-Media 

-လူမျိုးတုန်းသတ်ဖြတ်မှုနဲ့ အစ္စရေးကို ICJ မှာ တရားစွဲဆိုနိုင်ခဲ့တာဟာ အလွန်အရေးပါတဲ့ အလှည့်အပြောင်းတစ်ခုလို့ တောင်အာဖရိက ရှေ့နေအဖွဲ့က ပြောကြားလိုက်ပါတယ်။ 

နယ်သာလန်မှာ ကြာသာပတေးနေ့နဲ့ သောကြောနေ့ ကြားနာမှုအပြီး တောင်အာဖရိကကို ပြန်ရောက်လာတဲ့ ရှေ့နေအဖွဲ့ကို ပြည်သူတွေက ကြိုဆိုခဲ့ကြပါတယ်။ 

ပါလက်စတိုင်းတွေအပေါ် အစ္စရေးရဲ့ ကျူးလွန်မှုတွေဟာ လူမျိုးတုန်းသတ်ဖြတ်မှုမြောက်တယ်လို့ ယူဆတဲ့အတွက် တောင်အာဖရိကဟာ ICJ ကို တင်ပြ တိုင်ကြားခဲ့တာ ဖြစ်ပါတယ်။ 

တောင်အာဖရိက ကိုယ်စားပြု ရှေ့နေအဖွဲ့ အဖွဲ့၀င် Tembeka Ngcukaitobi က သူတိုရဲ့တိုင်ကြားမှုဟာ အရေးပါတဲ့ အလှည့်အပြောင်း ဖြစ်ခဲ့ပြီး အစ္စရေးရဲ့ လုပ်ရပ်တွေကို ဥပဒေရှုထောင့်ကနေ ကမ္ဘာကြီးထံ ချပြနိုင်ခဲ့တယ်လို့ လေဆိပ်က သတင်းစာရှင်းလင်းပွဲမှာ ပြောကြားခဲ့ပါတယ်။ 

ပါလက်စတိုင်းပြည်သူတွေရဲ့ လွတ်မြောက်ရေးကြိုးပမ်းမှု ဆက်လက်ရှိနေအုံးမယ်လို့လည်းသူက မှတ်ချက်ပြုပါတယ်။ 

“ပါလက်စတိုင်းပြည်သူတွေ ရဲရဲရင့်ရင့် ကြိုးပမ်းလျှောက်လှမ်းနေတဲ့ လွတ်မြောက်ရေးခရီးရှည်မှာ တစ်ထောင့်တစ်နေရာကနေ ပါ၀င်ကူညီနိုင်ခဲ့တဲ့အတွက် တောင်အာဖရိက ရှေ့နေအဖွဲ့က ဂုဏ်ယူမိပါတယ်”

Ref: Aljazeera