ဂါဇာပြည်သူများကို အကူအညီပေးနိုင်ရေး အင်ဒိုနီးရှားက ဆေးရုံသင်္ဘော စေလွှတ်

ဇန်န၀ါရီ ၁၉၊ ၂၀၂၄

M-Media 

-အစ္စရေးရဲ့ အကြမ်းဖက်သတ်ဖြတ်မှုကို ၃ လကျော် ခံစားနေရတဲ့ ဂါဇာကမ်းမြှောင်က ပါလက်စတိုင်းပြည်သူတွေအတွက် အင်ဒိုနီးရှားက ဆေးရုံသင်္ဘောတစ်စီးကို ကြာသာပတေးနေ့မှာ စေလွှတ်လိုက်ပါတယ်။ 

အင်ဒိုနီးရှားဟာ ပါလက်စတိုင်းလွတ်မြောက်ရေး တစ်စိုက်မတ်မတ် ထောက်ခံလာတဲ့ နိုင်ငံတစ်ခုဖြစ်ပြီး အကူအညီတွေကိုလည်း မပြတ်တမ်း ပေးပို့နေတာ ဖြစ်ပါတယ်။ 

နို၀င်ဘာလအတွင်းက ဂါဇာကို လေယာဥ်နှစ်စီးစာ အကူအညီတွေ ပေးပို့ခဲ့ပါတယ်။ 

အခုတစ်ခေါက်မှာတော့ ဆေး၀ါးကုသရေး အခက်အခဲတွေ့နေတဲ့ ဂါဇာပြည်သူတွေအတွက် ဆေးရုံသင်္ဘော KRI Radjiman Wedyodiningrat-992 ကို စေလွှတ်ခဲ့တာပါ။ အီဂျစ်နိုင်ငံမှာ ဆိုက်ကပ်ပြီး ပါလက်စတိုင်းပြည်သူတွေကို အကူအညီပေးမှာဖြစ်ပါတယ်။ 

“လူသားဆန်မှုနဲ့ နိုင်ငံတကာ ဥပဒေတွေကို ကျော်လွန်ပြီး မရပ်မနား ပြုလုပ်နေတဲ့ တိုက်ခိုက်မှုတွေကြောင့် အတိဒုက္ခရောက် ထိခိုက်ခံစားနေရတဲ့ ဂါဇာက ညီအစ်ကိုမောင်နှမတွေကို အကူအညီတွေ ပေးဖို့အတွက် ဒီကနေ့ မင်းတို့ ထွက်ခွာရမှာဖြစ်တယ်။ စစ်ပွဲမှာ ငါတို့ မပါ၀င်ပေမယ့် ပါလက်စတိုင်းက ငါတို့ရဲ့ ညီအစ်ကိုမောင်နှမတွေနဲ့ အတူရှိကြောင်း၊ စာနာကြောင်း ပြသဖို့ ငါတို့မှာ တာ၀န်ရှိပါတယ်”လို့ အင်ဒိုနီးရှား ကာကွယ်ရေး၀န်ကြီး ပရာဘို၀ို ဆူဘီယန်တိုက သင်္ဘောပေါ် လိုက်ပါသွားတဲ့သူတွေကို ပြောကြားခဲ့ပါတယ်။ 

အင်ဒိုနီးရှား ဆေးရုံသင်္ဘောဟာ လုပ်ငန်းဆောင်ရွက်နိုင်ဖို့အတွက် အီဂျစ်အာဏာပိုင်တွေထံကနေ ခွင့်ပြုချက်တောင်းရမှာ ဖြစ်ပါတယ်။ 

ဂါဇာက အစ္စရေးရဲ့ တစ်ကျော့ပြန်လူသတ်ပွဲဟာ ၃ လကျော်လာခဲ့ပြီဖြစ်ပြီး ပါလက်စတိုင်းပြည်သူ ၂၄၀၀၀ ကျော် အသတ်ခံထားရပါတယ်။ 

လူနေအိမ်၊ ဆေးရုံ၊ စာသင်ကျောင်း၊ ဒုက္ခသည်စခန်း၊ ဘာသာရေးဆိုင်ရာနေရာတွေအပါအ၀င် ဂါဇာကမ်းမြှောင်က  အဆောက်အဦးတွေရဲ့ ၈၀ ရာခိုင်နှုန်းကျော်ကိုလည်း အစ္စရေးက ဖျက်ဆီးထားပါတယ်။ 

အခုတစ်ခေါက် အင်ဒိုနီးရှားရဲ့ အကူအညီမှာ ကလေးငယ်တွေအတွက် မရှိမဖြစ်လိုအပ်တဲ့ ပစ္စည်းတွေ၊ စားနပ်ရိက္ခာတွေ ပါ၀င်မှာဖြစ်ပါတယ်။ 

ဒီခရီးစဥ် အသွားအပြန် ရက်ပေါင်း ၅၀ ကြာမြင့်မယ်လို့ အင်ဒိုနီးရှား ရေတပ်က ပြောပါတယ်။ 

Ref: Arab News